شد القلوع يا مراكبي ... مافيش رجوع يا مراكبي

الثلاثاء، مارس ٠٦، ٢٠٠٧

حواديت مصرية تاني مرة

حبايبي الحلوين .. قلنا المرة اللي فاتت إننا بدل ما كل شوية نتكلم عن مشاكل بلدنا وعيوبها .. نتكلم شوية بقى عن عيوبنا إحنا .. تعالوا كده نكمل الكلام عن التغيير اللي حصل للمصريين من خلال شوية حواديت مصرية .. ونشوف إيه اللي حصل للمصريين .. تاني
.
زمان
كان فيه إتنين أصحاب ماشيين في الشارع .. لقوا جنينة ليها سور ومليانة شجر تفاح .. الشجر كان طارح تفاح إنما إيه .. تحفة .. راح الأولاني قال للتاني: بقولك إيه .. أنا هاتشعبط و أنط السور ده وألم التفاح ده .. وإنت تقف لي ناضورجي هنا .. لو لقيت حد معدي من بعيد .. إعمل صوت الديك .. كوكوكوكوووووو .. علشان نلحق نهرب قبل ما يمسكنا .. ماشي؟ قاله: ماشي
.
المهم نط الولد فوق السور وفات دقيقتين وفجأة سمع التاني بينعر بعلو حسه .. كوكوكوكوووووو .. كوكوكوكوووووو .. راح الولد نط بسرعة وخرج من الجنينة زي الصاروخ .. لكن ما لاقاش حد معدي .. قاله: فيه إيه ياله؟ بتكاكي ليه مادام مافيش حد شايفنا عالصبح؟ قاله: فيه حد شايفنا .. ربنا شايفنا .. ربنا
.
راح التاني إتكسف وطاطى وشه في الأرض .. ومشي وهو خجلان من نفسه وحلف إنه ما يعملش كده تاني
.
دلوقت
كان فيه إتنين أصحاب ماشيين في الشارع .. لقوا جنينة ليها سور ومليانة شجر تفاح .. الشجر كان طارح تفاح إنما إيه .. تحفة .. راح الأولاني قال للتاني: بقولك إيه يله .. أنا هاتشعبط و أنط السور ده وألم التفاح ده .. وإنت تقف لي ناضورجي هنا .. لو لقيت حد معدي من بعيد .. إعمل صوت الديك .. كوكوكوكوووووو .. علشان نلحق نفلسع قبل ما يقفشنا .. ماشي؟ قاله: ماشي
.
المهم نط الولد فوق السور وفات ربع ساعة .. الوقت ده كان كفاية إنه يلم فيها التفاح كله .. خرج من الجنينة لقى صاحبه نايم .. زعق له وصحاه من النوم وقاله: إنت بتستهبل ياله؟ إزاي تنام وكان ممكن أي حد يعدي ويقفشنا؟ رد عليه وقاله: يا عم فيه ناس كتير عدت علينا طبعا قبل ما أنام .. يعني مثلا عدى علينا الواد دبدوب أبوروسية وأنا ولا همني علشان أنا عارف إنك ما بتخافش منه .. وعدى علينا الواد بيشو المريكيكو .. برضه ولا همني علشان أنا عارف إنك ما بتخافش منه .. ومافضلش غير ربنا اللي شايفنا .. وأنا عارف إنك برضة ما بتخافش منه .. رحت نايم
.
أرجوا إنكم تكونوا فهمتم حاجة .. والمعنى مازال في كرش الشاعراللي حاز إعجابكم .. ونلتقي في حواديت تانية إن شاء الله

التسميات:

58 Comments:

Blogger Hannoda said...

حلوة ولاّ ملتوته؟؟

حلوة.. :))

وأنا بقراها زار خيالي مين؟؟

زار خيالي زمايلي و جميع طلاب دفعتي السابقة وهمّ بيشتروا المونافستوهات من المكتبة اللي قدام المعهد

بس مونافستوهات ايه؟؟... مكتوبه ع الوورد و متضغرة و متنسقة وآخر جمال
شغل إحتراف و الماده بخمسة جنيه

أما بقى الواد دبدوب أبو روسية و بيشو المريكيكو

فدول عندنا منهم كتيير
أصلهم فكروني بكل اللي قال أنا مالي ... هو بيسرق في أرضى؟؟

ولاّ هي أساسا ده سرقة؟؟؟... ده لعب عيال يا عم

بيتهيألي كرش الشاعر مليان معاني كتيرة لصورة واحدة .. وباقي كروش المستمعين برضه مليانة معاني تانية غير اللي فكرش الشاعر

أصلها صورة معبيّة


بس انت حبت أسماء العيال ده منين؟ظ؟
:))

تحياتي

الثلاثاء, مارس ٠٦, ٢٠٠٧

 
Blogger mano said...

لأ ده كرش الشاعر كده مليان

القصة التانيه ضحكتنى جدا
بس انت اللى مألفها؟

فى انتظار باقى الحاجات اللى فى كرش الشاعر

الثلاثاء, مارس ٠٦, ٢٠٠٧

 
Blogger hebaz said...

كرش الشاعر باين عليه كبير أوى ربنا يكفينا شرة
أما بالنسبة للأخ الى نايم فى حاجة نسيت توضحها
أصلا لو عدى حد و صاحبة الى بيسرق أتقفش أول حاجة حيقولها أنا مالى أنا معرفوش دة أنا كنت نايم
يعنى من باب أنا و من بعدى الطوفان
تحياتى

الثلاثاء, مارس ٠٦, ٢٠٠٧

 
Blogger حــلم said...

ساعات بننسى
ساعات كتير بننسى
ان جيت للحق هى لحظات قليلة اللى بيفتكر فيها حد ان ربنا شايفه

والا ما كانش الحال بأة كدة

الثلاثاء, مارس ٠٦, ٢٠٠٧

 
Blogger يا مراكبي said...

Hannoda

طبعا أنا أيام الكلية كنت تاني واحد في الدفعة عنده كومبيوتر .. ماكانش على أيامنا الملخصات اللي عالوورد دي

تفسيرك ده للقصة يعتبر أحد التفاسير الجميلة اللي بتعبر عن السلبية .. وحقيقي أنا سعيد بتبادل الكروش مع القراء

الأسماء دي ليها عندي تفسير سياسي ما ينفعش أقوله علشان بأخاف من .. الضرائب

الثلاثاء, مارس ٠٦, ٢٠٠٧

 
Blogger يا مراكبي said...

Mano

القصة التانية من تأليفي لكن فكرتها مش من تأليفي .. تأليف حد تاني معرفوش

كرش الشاعر مليااان .. بس إنتوا إستحملوني

الثلاثاء, مارس ٠٦, ٢٠٠٧

 
Blogger يا مراكبي said...

Hebaz

مازال كرش الشاعر هو نجم الموسم لدي القراء .. ماشي

تحليلك الأخير للولد اللي نايم برضه صحيح .. دي بقت من أحد أهم خصائصنا اليومين دول .. إسأليني أنا

الثلاثاء, مارس ٠٦, ٢٠٠٧

 
Blogger يا مراكبي said...

حلم

الله عليكي .. هو ده فعلا الكلام المفيد .. لو كل واحد من أصغر عامل لأكبر مسؤل فكر إن ربنا شايفه .. عمر ده ما هيبقى حالنا أبدا

الثلاثاء, مارس ٠٦, ٢٠٠٧

 
Blogger Hannoda said...

طيب ايه علاقة السياية بالضرائب :) .. توهتني

الثلاثاء, مارس ٠٦, ٢٠٠٧

 
Blogger يا مراكبي said...

Hannoda

الضرائب = الناس اللي بيضربوا المدونين لو كتبوا حاجات سياسية

ومش هأتكلم أكتر من كدة علشان بأخاف قوي من الضرائب

الثلاثاء, مارس ٠٦, ٢٠٠٧

 
Blogger مبرمج حر said...

جه على دماغى أسم الله الرقيب
أيمانى وعملى الكامل بالأسم ده كفيل بأصلاح كل جوانب حياتى بدون شك

الثلاثاء, مارس ٠٦, ٢٠٠٧

 
Blogger قصاقيص said...

المعني حلو أوى
صعب أو ممكن مستحيل إن حد فينا يعيش نقي 100 في ال100 ومايطاوعش شيطانه ..... المهم مين فينا يقدر يرجع لما يفتكر ان ربنا موجود.....والاجمل لو رجع قبل فوات الأوان

الثلاثاء, مارس ٠٦, ٢٠٠٧

 
Blogger مُزمُز said...

وقع للتضامن مع كريم عامر وللدفاع عن حريتنا

http://blogger-in-jail.blogspot.com/

الثلاثاء, مارس ٠٦, ٢٠٠٧

 
Anonymous غير معرف said...

هل تذكر أحد الصالحين وهو جائع جدا ووجد التفاحة خارج السور أثناء أكلها تذكر أنها لصاحب البستان فبحث عنه فى كل مكان حتى وجده وطلب منه السماح فرفض حتى يزوجه ابنته العمياء-الكسحاء-البكماء-الصماء فقبل حتى يسامحه وفوجىء بها جميله وليس بها أى عيب وعندما سأل أبيها قال له أنها عمياء عن الحرام كسحاء عن طرق الشر بكماء لا تتكلم الا بخير صماء عن كل ما يغضب الله ---ورزقهما الله بسعيد بن المسيب!!!!!!هؤلاء ينجبوا هذا أما نحن فى زماننا ننجب ما ذكرت من أسماء .هذا والله أعلم....أبو عمرو

الثلاثاء, مارس ٠٦, ٢٠٠٧

 
Blogger يا مراكبي said...

مبرمج حر

صح .. كفاية قوي الإلتزام بمراقبة النفس وكله تنصلح بعد كدة .. نؤيدك بشدة

الثلاثاء, مارس ٠٦, ٢٠٠٧

 
Blogger يا مراكبي said...

قصاقيص

طبعا المبدأ العام هو: إتقوا الله ما إستطعتم

وربنا سبحانه وتعالى عالم بنا ويعلم أننا لا يمكنا الوصول إلى مائة في المائة .. لكن خلينا نحاول نقرب ليها عى قد مانقدر

الثلاثاء, مارس ٠٦, ٢٠٠٧

 
Blogger يا مراكبي said...

مزمز

منور المدونة

الثلاثاء, مارس ٠٦, ٢٠٠٧

 
Blogger يا مراكبي said...

Anonymous

نعم أذكر هذه القصة جيدا .. وصدقت في تعليقك بأن هذه الأجيال لا يمكنها أن تنجب سوى تلك النماذج

شكرا لتشريفك

الثلاثاء, مارس ٠٦, ٢٠٠٧

 
Blogger كلام لوجيك said...

دا الكرش مليان قصص ما شاء الله
وياما فى الجراب يا حاوي

طبعا الهدف والدرس المستفاد واضح ووصلنا ما ترمى اليه
احييك على قصصك المعبرة والهادفه
ومنتظرين بقية السلسلة
خالص تحياتى
ودمت بألف خير

الأربعاء, مارس ٠٧, ٢٠٠٧

 
Blogger يا مراكبي said...

ساكاماكا نيوز

ربنا يخليك وشكرا على ذوقك .. أنا سعيد جدا بمتابعتك

وبالنسبة للكرش .. ده معبي قوي فعلا

تحياتي

الأربعاء, مارس ٠٧, ٢٠٠٧

 
Blogger أميرة ويلز said...

ماعتش فى خشا

بس كويسة الحكايات عن عيوبنا ربنا يعينك على الباقى
يسعدنى ان دى اول زيارة ليا هنا يامراكبى ببس اكيد مش الاخيرة ان شاء الله

تحياتى

الأربعاء, مارس ٠٧, ٢٠٠٧

 
Blogger khaled said...

فيه نكتة بتقول ان عمدة بلدنا جمع البهلوان بتاعه و سأله انا احسن و الا فلان؟
قاله انت يا عمده فلان كان بيخاف من الامريكان انت ما بتخافش
قاله طب انا احسن و الا علان؟
قاله انت يا عمدة علان كان بيخاف من الروس و انت ما بتخافش
قاله طب انا احسن و الا الشيخ الشعراوى؟
قاله انت يا عمدة الشعراوى كان بيخاف من ربنا و انت ما بتخافش
----------------------

الأربعاء, مارس ٠٧, ٢٠٠٧

 
Blogger khaled said...

و المعنى فى بطن صاحبنا اللى واكلها

الأربعاء, مارس ٠٧, ٢٠٠٧

 
Blogger يا مراكبي said...

أميرة ويلز

أهلا بيكي يا أميرة .. نورتي

وفعلا زي ما قلتي .. اللي إختشوا ماتوا من زمااااااااان .. من زمان قوي قوي

الأربعاء, مارس ٠٧, ٢٠٠٧

 
Blogger يا مراكبي said...

Khaled


ألف مبروك .. إنت اللي فزت بجايزة أصح تفسير للقصة .. إنت اللي طلعت الأول

والجايزة هتستلمها من أمن الدولة قريب .. مبروك

:-)

الأربعاء, مارس ٠٧, ٢٠٠٧

 
Blogger يا مراكبي said...

خالد تاني

هو صاحب واحد؟ دول شلة كبيرة يا معلم

الأربعاء, مارس ٠٧, ٢٠٠٧

 
Blogger Sampateek said...

حد ينام و يسيب التفاح
:))
لا كله الا ربنا
الحمد لله ربنا يرزقنا التقوى و يقوينا عليها

الأربعاء, مارس ٠٧, ٢٠٠٧

 
Blogger يا مراكبي said...

Sampateek

آمين يارب .. يسمع من بقك ربنا

تحياتي

الأربعاء, مارس ٠٧, ٢٠٠٧

 
Anonymous غير معرف said...

علي فكره كرش الشاعر كبير اوي وفيه لسه ياما اوي انتا عارف انا عاما زي مين زي الولد اللي نايم علي العموم بوست جميل جدا وانا من المعجبين بيك

الأربعاء, مارس ٠٧, ٢٠٠٧

 
Blogger كراكيب عادل said...

الاهم من كدة فين صاحب الجنينة مهو المال السايب يعلم السرقة برضو وخاصة لما يكون التفاح مستوي انا كان نفسي اكون معاهم بس مش هسرق ولا هراقب انا كنت عايز اصورهم بس



تحياتي

الخميس, مارس ٠٨, ٢٠٠٧

 
Blogger الأباصيرى said...

الخوووونة
سرقوا التفاح تانى من غير مايقولولى


على العموم دول مينفعش معاهم غير مقلب من بتوعى

أممممممم

تعبان على الشجرة...
قديمة

كلب بوليسى شرس تحت الشجرة...
ممكن

ثلاثة من أصحابى ويعملوا صعايدة وحراس للجنينة ويجروا وراة بالشوم
ممكن ندمجها مع الكلب

وممكن شوية شحم على الشجرة عشان نبقى ظبطنا الزبون


سيبنى أمخمخ وأرجعلك

بس ياترى أحنا فعلا مبنخافش من ربنا
ولا فاكرين أننا عشان مش شايفين ربنا فهو مش شايفنا

دة مش كرش الشاعر دة سرداب ياعم الحاج

الخميس, مارس ٠٨, ٢٠٠٧

 
Blogger يا مراكبي said...

fares

شكلنا كده كلنا نايميين .. دي الحاجة الوحيدة اللي كلنا متفقين عليها

متشكر كتير على إطراءك .. ده من بعض ما عندكم .. أهلا بيك

الخميس, مارس ٠٨, ٢٠٠٧

 
Blogger يا مراكبي said...

كراكيب عادل

والله صدقت .. هو مال سايب فعلا

بس إيه المفاجأة الجميلة دي؟ موقع الصور والرسوم ده هايل .. ده أنت طلعت موهبة مدفونة

الخميس, مارس ٠٨, ٢٠٠٧

 
Anonymous حسن محمود said...

يااااه ياأخى شايل مصريتك معاك ولسه عارف تمشى ؟
دى مصر تقيلة قوى قوى
كتر خيرك
كويس انك لسه مؤمن بالبلد ولسه مصر على بالك
فى ناس كتير باعوها
بس فكرتنى باغنيه كنت بسمعها زمان قوى : صوت شعب ماشى الاف السنين
راح واحد صاحبى قال ايه ده
ماشى الاف السنين ولسه مجالوش فلات فوت ولا رجليه تعبت
المهم كنت عايز اعلق على المال السايب يعلم السرقة
انا كنت عايز اضيف المال السايب يعلم السرقة لولاد الحرام
ولاد الحلال مايفرقش معاهم المال سايب ولا لا طالما انه مش بتاعهم يبقى ماينفعش ياخدوا
ولا أيه رأيك؟
وقصة جميله
سلام

الخميس, مارس ٠٨, ٢٠٠٧

 
Blogger tamer said...

الرسالة وصلت

تسلم الايادى

تحياتى

الخميس, مارس ٠٨, ٢٠٠٧

 
Blogger يا مراكبي said...

الأباصيري

الله يخليك .. بلاش المقالب بتاعتك هنا .. إحنا ما نقدرش عليها

ولو إن فكرة الشحم والكلب دي هايلة .. بس الناس ممكن تخاف تدخل المدونة بعد كده

فيه ناس كتير فعلا مبتخافش من ربنا
و أغلب الباقيين فاكرين أنه عشان مش شايفين ربنا فهو مش شايفهم .. تعالى الله عن ذلك علوا كبيرا فهو يرى ويعلم كل شيء

الخميس, مارس ٠٨, ٢٠٠٧

 
Blogger يا مراكبي said...

حسن محمود

أنا سعيد جدا بزيارتك الكريمة وتعليقك الجميل .. حلو موضوع الفلات فوت ده

أنا موافقك تماما إن المال السايب ما يفرقش مع أولاد الحلال مهما حصل

تحياتي

الخميس, مارس ٠٨, ٢٠٠٧

 
Blogger يا مراكبي said...

tamer

متشكر قوي .. نورت والله

الخميس, مارس ٠٨, ٢٠٠٧

 
Blogger Memo said...

ابه النهايات المفرحه دي
يا سلام انا كدا اطمنت عليك و على افكارك التفاؤليه

الحياه حلوه
تحياتشيييييييييي

الخميس, مارس ٠٨, ٢٠٠٧

 
Blogger ادم المصري said...

نفسي اشوف كرش الشاعر دا اللي مليان معاني

لا وايه
معانييييي

معاني م التقيلة

ههه
لك تحياتي

الخميس, مارس ٠٨, ٢٠٠٧

 
Blogger Hannoda said...

فينك...

اشتقت لحواديتك ..

انهاردة معاد اللقاء بتاعهم زمانهم هناك :(

حاسة كإني معاهم..

الخميس, مارس ٠٨, ٢٠٠٧

 
Blogger Sharm said...

يا ضمير العالم متى تصحو

يا ضمير العالم لما تغفو

الخميس, مارس ٠٨, ٢٠٠٧

 
Blogger يا مراكبي said...

Memo

المرة الجاية هاخللي النهاية سعيدة والبطل هيتجوز البطلة

منورة .. بس كل ده ولسه مقيمة فوق الدولاب؟

الخميس, مارس ٠٨, ٢٠٠٧

 
Blogger يا مراكبي said...

آدم المصري

كرش الشاعر يساع من الحبايب ألف .. هأبقى أوريهولك لما آجي مصر

متشكر على الزيارة والتعليق الجميل .. وتحياتي برضة

الخميس, مارس ٠٨, ٢٠٠٧

 
Blogger يا مراكبي said...

Hannoda

متشكر قوي على الثقة الغالية دي

بس إنتي عارفه إن المدونات دي مش زي الجرنال لازم نكتب فيه كل يوم

وبعدين إكتبي إنت الأول .. فين نشاطك وإبداعاتك؟

الخميس, مارس ٠٨, ٢٠٠٧

 
Blogger يا مراكبي said...

Sharm

مع تقديري ليك .. بس خلينا الأول في ضمير المصريين وبعدين نشوف ضمير العالم

تحياتي

الخميس, مارس ٠٨, ٢٠٠٧

 
Blogger عايزه اتجوز مدوٌن said...

اعتدر مقدما و لكنهل دعوه لزياره مدونتي الجديده التي اطلقتها اليوم

الجمعة, مارس ٠٩, ٢٠٠٧

 
Blogger الوردة السوداء said...

اعتقد اللى عايز توصله وصل


اشكرك بشدة

امثلتك حلوة اوى
وافكارك كمان

الجمعة, مارس ٠٩, ٢٠٠٧

 
Blogger يا مراكبي said...

عايزه اتجوز مدوٌن

أهلا بيكي .. أنا زرت المدونة ولقيت التعليقات ممنوعة هناك

فكرة المدونة جديدة وظريفة ونتمنى إن المواضيع اللي بعد كده تكون على نفس مستوى الظرف والحداثة

تحياتي .. مدون بس متزوج ويعول

الجمعة, مارس ٠٩, ٢٠٠٧

 
Blogger يا مراكبي said...

الوردة السودة

كويس إنه وصل لك المعاني .. متشكر على إطراءك الجميل

تحياتي

الجمعة, مارس ٠٩, ٢٠٠٧

 
Blogger khaled said...

طب هاخد الجايزة امتى
هات الكوبون ممضى من سيادتك
سينييه يعنى و هاطلع جرى على امن الدولة اقلهم

الأحد, مارس ١١, ٢٠٠٧

 
Blogger يا مراكبي said...

خالد

بلاش تروح وتتعب نفسك .. المواصلات عليهم

وبعدين إمضائي مابقاش ينفع دلوقت .. أنا إتجننت خلاص

الأحد, مارس ١١, ٢٠٠٧

 
Blogger R2K said...

: )

الثلاثاء, مارس ١٣, ٢٠٠٧

 
Blogger koukawy said...

مش محتاجه 00 واضحه جدا و دمها خفيف

الخميس, مارس ١٥, ٢٠٠٧

 
Blogger يا مراكبي said...

r2K

يا أهلا يا أهلا

الخميس, مارس ١٥, ٢٠٠٧

 
Blogger يا مراكبي said...

koukawy

متشكر كتير .. منور بجد

الخميس, مارس ١٥, ٢٠٠٧

 
Blogger سلسبيل said...

يامراكبي..
عارف اللي بيغيظني ساعات..ان الحرامي ماعندوش الجرأة حتي انه يعترف انه مش خايف من ربنا
يعني دا مثلا ممكن يبقي صلي ركعتين قبل الجريمة..عشان ربنا يوفقه...عامل زي محمود المليجي ف الافلام القديمة..كان يبقي طالع رئيس عصابه ويقول احنا باذن الله ربنا حايساعدنا ف العمليه الجاية ومش حايخيب ظني.
انا اعرف حكايه حقيقيه واحد كان عنده شجره مشمش..وكان فيه حرامي سرقها مشمشه مشمشه..ولما المشمش خلص...بدأ يلف عالغصون والورق يقرقشهم... ماخلاش فيها صراحة
وبعدين هرب بره...وبعد كام سنه..حب يخلص ذمته بعت لصاحب الشجره هديه..كتعويض..كانت علبه مربي مشمش صغيرة بتاعت فيتراك دي..وقال انه بكده ريح ضميره عشان ربنا يباركله ومابيحبش ياكل حرام.. وكل ماكان حد يفتح معاه سيره شجره المشمش بعد كده كان ..بكل برود يقول..الله؟ مانا رديتله حقه وانتهينا..لو سمحتو ماحدش يفتح السيره دي تاني عشان بتخنقني..خلاص الموضوع خلص واتقفل.

تفتكر ده المفروض صاحبنا يعمل فيه ايه؟؟

الأحد, مارس ١٨, ٢٠٠٧

 
Blogger يا مراكبي said...

سسلسبيل

اللي بتقولي عليه ده بيحصل فعلا .. ودول الناس اللي فاهمين الدين غلط وكأن العلاقة بين العبد وربه علاقة مادية فيها حسابات الربح والخسارة المادية والعياذ بالله

أهلا بيكي وشكرا على التعليق الهادف ده

الأحد, مارس ١٨, ٢٠٠٧

 

إرسال تعليق

Links to this post:

إنشاء رابط

<< Home