حواديت مصرية تاني مرة

حبايبي الحلوين .. قلنا المرة اللي فاتت إننا بدل ما كل شوية نتكلم عن مشاكل بلدنا وعيوبها .. نتكلم شوية بقى عن عيوبنا إحنا .. تعالوا كده نكمل الكلام عن التغيير اللي حصل للمصريين من خلال شوية حواديت مصرية .. ونشوف إيه اللي حصل للمصريين .. تاني
.
زمان
كان فيه إتنين أصحاب ماشيين في الشارع .. لقوا جنينة ليها سور ومليانة شجر تفاح .. الشجر كان طارح تفاح إنما إيه .. تحفة .. راح الأولاني قال للتاني: بقولك إيه .. أنا هاتشعبط و أنط السور ده وألم التفاح ده .. وإنت تقف لي ناضورجي هنا .. لو لقيت حد معدي من بعيد .. إعمل صوت الديك .. كوكوكوكوووووو .. علشان نلحق نهرب قبل ما يمسكنا .. ماشي؟ قاله: ماشي
.
المهم نط الولد فوق السور وفات دقيقتين وفجأة سمع التاني بينعر بعلو حسه .. كوكوكوكوووووو .. كوكوكوكوووووو .. راح الولد نط بسرعة وخرج من الجنينة زي الصاروخ .. لكن ما لاقاش حد معدي .. قاله: فيه إيه ياله؟ بتكاكي ليه مادام مافيش حد شايفنا عالصبح؟ قاله: فيه حد شايفنا .. ربنا شايفنا .. ربنا
.
راح التاني إتكسف وطاطى وشه في الأرض .. ومشي وهو خجلان من نفسه وحلف إنه ما يعملش كده تاني
.
دلوقت
كان فيه إتنين أصحاب ماشيين في الشارع .. لقوا جنينة ليها سور ومليانة شجر تفاح .. الشجر كان طارح تفاح إنما إيه .. تحفة .. راح الأولاني قال للتاني: بقولك إيه يله .. أنا هاتشعبط و أنط السور ده وألم التفاح ده .. وإنت تقف لي ناضورجي هنا .. لو لقيت حد معدي من بعيد .. إعمل صوت الديك .. كوكوكوكوووووو .. علشان نلحق نفلسع قبل ما يقفشنا .. ماشي؟ قاله: ماشي
.
المهم نط الولد فوق السور وفات ربع ساعة .. الوقت ده كان كفاية إنه يلم فيها التفاح كله .. خرج من الجنينة لقى صاحبه نايم .. زعق له وصحاه من النوم وقاله: إنت بتستهبل ياله؟ إزاي تنام وكان ممكن أي حد يعدي ويقفشنا؟ رد عليه وقاله: يا عم فيه ناس كتير عدت علينا طبعا قبل ما أنام .. يعني مثلا عدى علينا الواد دبدوب أبوروسية وأنا ولا همني علشان أنا عارف إنك ما بتخافش منه .. وعدى علينا الواد بيشو المريكيكو .. برضه ولا همني علشان أنا عارف إنك ما بتخافش منه .. ومافضلش غير ربنا اللي شايفنا .. وأنا عارف إنك برضة ما بتخافش منه .. رحت نايم
.
أرجوا إنكم تكونوا فهمتم حاجة .. والمعنى مازال في كرش الشاعراللي حاز إعجابكم .. ونلتقي في حواديت تانية إن شاء الله