حواديت مصرية
بدل ما كل شوية نتكلم عن مشاكل بلدنا وعيوبها .. مش نيجي مرة نشوف عيوبنا إحنا؟ تعالوا كده نتكلم عن التغيير اللي حصل للمصريين من خلال شوية حواديت مصرية كلكوا عارفينها .. ونشوف إيه اللي حصل للمصريين
.
زمان
كان فيه راجل بيموت وحواليه أولاده محاوطين السرير .. والراجل حاطط جنبه شوية عصيان خشب .. قعد يوزع على كل ولد عصاية وبعدين قالهم: كل واحد يحاول يكسر العصاية اللي معاه .. طبعا كل واحد كسر العصاية بسهولة وقعدوا يبصوا لبعض وكأنهم بيقولوا .. إيه العبط ده .. دي حاجة سهلة جدا
.
المهم .. الراجل راح مناول كل ولد حزمة عصيان كبيرة وقالهم إكسروها .. طبعا كل واحد قعد يحزق ويحاول لكن طبعا ما حدش قدر يكسر حزمة العصيان دي .. هنا بقى أبوهم قالهم: شفتوا .. ده اللي أنا عايزكوا تتعلموه .. لو فضلتوا متحدين مع بعض ما حدش هيقدر عليكم زي حزمة العصيان دي .. لكن لو كل واحد فضل لوحده .. هاينكسر زي العصاية اللي إنتوا كسرتوها بسهولة
.
دلوقت
كان فيه راجل بيموت وحواليه أولاده محاوطين السرير .. والراجل حاطط جنبه شوية عصيان خشب .. قعد يوزع على كل ولد عصاية وبعدين قالهم: كل واحد يحاول يكسر العصاية اللي معاه .. طبعا كل واحد كسر العصاية بسهولة وقعدوا يبصوا لبعض وكأنهم بيقولوا .. هو أبونا بيشتغلنا وألا إيه؟
.
المهم .. الراجل راح مناول كل ولد حزمة عصيان كبيرة وقالهم إكسروها .. طبعا كل واحد قعد يحزق ويحاول لكن طبعا ما حدش قدر يكسر حزمة العصيان دي غير أخوهم الكبير الجتة .. كسرها من أول مرة على طول .. هنا بقى أبوهم قالهم: شفتوا .. ده اللي أنا عايزكوا تتعلموه .. طول ما أخوكم البغل ده معاكم .. ما حدش هيقدر عليكم أبدا
.
أرجوا إنكم تكونوا فهمتم حاجة .. والمعنى في كرش الشاعر .. ونلتقي في حواديت تانية قريب
تعليقات
الزمن دة بتاع اللى لة ضهر ميضربش على بطنة
ويابخت من كان الوزير جارة
الناس دلوقتى (وأنا منهم) أن ليهم ضهر
وأنهم يعرفوا الضابط فلان والقاضى علان ويبقوا قرايب وكيل النيابة فلان
وعلى رأى العالم داروين بتاع التطور
الحياة موكب الاقوياء ولامكان فيها للضعفاء
أبقى فكرنى افتخر بيك أنت كمان
وأقول ليا واحد صاحبى كرشة مليان
حلوه مووت
هذا هو معنى الكوسة المستخبى فى كرش الشاعر
ويختبىء داخل الكرش برضة حاجات تانية كتير ....زى مثلا
المحسوبية
زمن الفهلوة
زمن الفتونة والعضلات
النظام العالمى الجديد (بالجذمة للى بتكلم)
يا غولة عينك حمرا
واللى له ضهر مينضربش على بطنه
وعمااااااار يا بلدى
ازيك كدة؟
بس الاب دلوقتى عنده حق بعد ما ثبت ان مافيش حاجة اسمها اتحاد
غير الاتحاد السكندرى
واهو متنيل بنيلة
ومفضوح بمدربيه على الفضائيات
يعنى مثلا انا عايزة ابنى يدخل كلية الشرطة
وعايزة اعلمه رياضة عنيفة
سومو مثلاً
:)
دلوقتي حتي لو قوه من الناس ع حق ونفر واحد هو الي ع باطل بس معاه فلوس اوله سلطه في المكان يبقي يلا السلامه ع الحق الي هيضيع
بس لعلمك فعلا احلي حاجه اتعلمتها اناواخواتي
ان حتي لو الحق ع وحده فينا يبقي نقف كلنا معاهاونقول انها ع حق عشان محدش يشمت فيها او يعتبرها صيده سهله وملهاش رجاله يقفو معاها وطبعا ده تعليم الزمن
شكرا للفلم الابيض واسود الي انت حكيته في اول البوست
تحياااااتي
إزيك يا ياسر .. عامل إيه؟ إيه الغيبة الطويلة دي؟ من تاني بوست لسة ما كتبتش حاجة جديدة ليه؟ لعلك بخير
عموما الإسقاط اللي إنت طرحته في القصة دي مسؤولية كرش المتلقي
أنا كرشي مالوش دعوة ياعم .. ماتجيبليش الكلام يا باشمهندس
أنا اللي لازم أفتخر بيك لأنك تعرف كل الناس المهمة اللي قلت عليهم دول .. أنا كدة إطمنت إن ليا ظهر
إبقى إفتكر أخوك في الزنقة وأنا هأفكرك علشان تفتخر بكرشي للصبح
متشكر كتير على تعليقك الجميل .. نورتينا
أنا كويس والحمد لله
طبعا إحنا متفقين من زمان مع بعض إن مافيش حاجه إسمها نظرية المؤامرة ولا حاجه خالص
أنا قصدي خير زبك كده بالظبط .. وعمار يا بلدي بجد
فعلا عندك حق
أنا بقى إبني إتعلم الكراتيه .. بس للأسف .. لما بأضربه ألاقيه بيعرف يصد كويس
بلاش السومو دي .. مش هاتستحملي اللي هايجرا .. لكن دليه شرطة وخلاص .. أهو ينفعنا في الزمن المهبب ده
ياه .. إنت تقريبا أصغر مدونة سنا على حد علمي .. لكن كلامك كبير
نورتي بجد ومتشكر كتير على تعليقك الجميل .. وربنا يوفقك إن شاء الله
بس
مافهمتش
ممكن نفتح كرش الشاعر ؟
:)
افصح
ابن
ابلج
مقدرش أبلج أكتر من كدة .. الإنكشارية والعسس بيقفشوا المدونين دلوقت
منور والله
طول ما أخوهم الكبير عايش يبقى هما فى التمام , حسوا أنه قرب يموت , يبحثوا فى أخوتهم عن واحد تانى ينفع أو يعتمدوا على أبن أخوهم الكبير
إنت اللي قلت .. انا ماليش دعوة ياعم
الإسقاط دايما مسؤلية المتلقي .. حتى لو صحيح
تحليل رائع
ساعتها كل واحد هيكره ان ده اخوه
وساعتها برده هيطبقوا القصه بتاعت زمان
هي دي المشكلة بتاعتنا .. دايما ما بنتعلمش من التاريخ وبنعيد التجربة ونخوضها لحدة آخرها وبعد كده بنوصل لنفس النتيجة
طب ما كان من الأول
تحياتي ليك
فعلا المعني في كرش الشاعر
و في حاجة كمان
بصوا لحاجات كتير
المنافق البلطجي صاحب النفوذ و هلم جرة
فعلا المعني في كرش الشاعر مرة تانية علشان الشاعر شكله جعان
انت متاكد انها كانت عصيان من بتاعة زمان ولا تقليد مهو يمكن يكون عصيان صيني بتتكسر بسرعه والعيال دول الي في الاول استهبلوا فيها علشان ابوهم يقولهم نفس الكلام دة وميحملهمش اي حاجة زيادة
والله ما فاهم حاجة بس حلو المعني في كرش الشاعر
الربط المتناقض اللي عملته بين فعلا سياسة العصر ومبادئه
تحياتي
وعايزك تعتبرنى من زوارك الدائمين منذ هذه اللحظه
اجمل ما فى هذا البوست هو انك كتبته بشكل نفسى مغاير وكأننا بتقرأ هذه القصه الشهيرة لأول مرة
وعجبنى طبعا الاسقاط السياسى الموجود فى كرش الكاتب
تحياتى
موفق دائما ودمت بألف خير
أولا مبروك للزمالك من أهلاوي صميم
ثانيا أحب أوضح إني معنديش كرش ولا حاجة لحسن تفتكروا إني تخين ولا حاجة
ومتشكر قوي على تعليقك الجميل
أهلا بيك .. شكرا على الزيارة والتعليق وطبعا يشرفني إني أزور مدونتك .. أنا جاي حالا
اظن ده تلخيص بسيط
للواقع زمان
و الواقع الآن
و الفرق واضح
بس عاجبنى قوى حكاية
طول ما أخوكم البغل ده معاكم ما حدش هيقدر عليكم أبدا
وصلت
اشكرك بشدة
هلا والله
أنا أحب بس أوضح إن الصينيين بينتجوا جميع أنواع الجودة .. وأنا شفت في أمريكا منتجات صينية تفوق المنتج الأمريكي وأرخص
سمعة المنتج الصيني الرديء دي مش موجودة غير في مصر علشان المستوردين المصريين بيستوردوا زبالة الجودة الصينية
وبعدين ولا يهمك القصة يا أفندم .. المهم إن الكرش عجبك
أهلا بيكي وبأحييكي على فهم المضمون من القصة
نورتينا
أهلا بيك .. شرفتني ونورتني وبأشكرك على الإطراء الجميل ده .. ده بس من ذوقك
كرش الكاتب مليان حواديت .. إبقى شرفني وتابعها
تحياتي
طبعا الإتحاد فيه كل القوة .. أمال تفتكر إحنا ليه بقينا ضعفاء في العالم دلوقت؟
أهلا بيك
متشكر قوي
تخيلي بقى لما البغل ده يبقى في بطن الشاعر
شفتي حالنا وصل لفين؟
لا شكر على واجب .. لسه فيه الأصعب بعد كده
تحياتي
بحييك من قلبي
يبقى لو لقوا واحد حاسين انه ممكن يكون البغل يقضوا عليه علشان الاخوات يبقوا شوية بقر ملفوفين حوالين اخوهم الاوسط اللى عامل زى طور الله فى برسيمه
و برضه المعنى فى كرش الكاتب
بجد جميلة اوى
بس فيها قوة
ولازم يكون فى قوة
وتحدي اكتر
احم احم
هو انت هنا؟
علشان انت سميت البوست ده باسم مدونتى فقررت ان اضع مدونتك فى مفضلتى اللى فى مدونتى
هههههههههههههه
بجد بما انى باتابع مدونتك و بحب مواضعها المتميزة فانا لى الشرف فى وضعها
الإخوة والأخوات من أبناء مصر الأبرار ,نقدم إليكم المبادرة المصرية للعفو والإصلاح –مبادرة الإخلاص- والتى تمثل طرحا مصريا لاستنهاض مصر يخاطب المخلصين من أبنائها ,ويتطابق مع الإرادة الجمعية للأغلبية المصرية الصامتة وهو ما يجعله الأقدر على تحقيق أهدافه ,نقدمه إليكم آملين فى تأييدكم له ,وسائلين الله عز وجل أن تعود به مصر كما أراد لها أن تكون .
ونرحب بتفاعلكم وآرائكم من خلال زيارة موقع المبادرة : www.mobadrtalekhlas.blogspot.com
أنا اللي بأرحب بيك من كل قلبي .. أهلا بيك ونورت المدونة
برضه ده تفسير تاني صحيح .. بس الحل هو إن الإخوات ما يسيبوش فرصة للأعداء إنهم يستفردوا بأخوهم ده
واضح إن كرش الكاتب بقى مشهور جدا أكتر من الكاتب نفسه
برافو عليك
لازم نتعلم إننا نرجع نطبق القصة الأولى وأكتر كمان .. علشان الزمن ده عايز كده وأكتر من كده
أهلا بيك
ده شرف ليا أنا يا أفندم ويشرفني إني أضيفك عندي برضه .. دايما منور
اللي شايفاه في المعنى إننا بقينا بنعتمد على البلطجة و لوي الدراع.. بدل الحكمة والمسانده
وان ((المجانص)) هي اللي بتنفع اليومين دول
مش عارفة أنا كده جبتها ولاّ ايه؟؟
بس اللي قاله أبو محمد برضه صح
المهم اننا بقينا بنقوّي ظهرنا بالبلطجة أو الوسطا بدل ما نقويه بالأخلاق و التدين
عجبني فتح الحوار بالشكل الجديد ده :)
أو يمشي و يسيبهم
ساعتها كل واحد هيقعد يحزق يحزق لحد أما ...... بس خلاص
شكرا للزيارة .. أنا طبعا قرأت الموضوع لكن مشفتش الحل الموضوعي وآليته
عموما شكرا على الدعوة
افه العصر
للاسف رغم محاوله سرد الوضع في اطار قصه الا انه مازال مؤلم
تحياتشي يا احمد على اثاره الموضيع الرائعه تشييي
فعلا بقت هيا دى مصر يا عبلة ...البلطجى هو اللى واخد فيها حقه تالت ومتلت ....
وياسلام بقى لو كان يمت لسلك الشرطة بصلة او مسنود من حد فيها
سلام مربع لحقوقنا اللى ضاعت
تحياتى ليك و لكرش الشاعر
الإستنتاجات اللي قولتيها كلها مظبوطة تماما .. بس إنتي عرفتي المجانص دي منين؟
هو برضة إستنتاج ممكن حدوثة طبعا بس ممكن يطلع منه ريحة مش ولا بد .. كويس إنك ما كملتش وإلا كنت لازم أرش المدونة بمعطر للجو
حمد اللة على سلامتك .. نزلتي من فوق الدولاب ولا لسة؟
والله عندك حق .. شر البلية ما يضحك
منورة
دي مش مصر يا عبلة .. دول بقوا المصريين يا عبلة
مكن سلام مثلث بدل سلام مربع لحقوقنا اللي ضاعت؟
المثل ده كان من زمان واللي طلعه كان بيتنبأ باللي هايحصلنا دلوقت
كرش الشاعر بيحي جميع المعجبين
اخوهم ده كان لابس تيشرت مقلمة احمر و ابيض و حاطط صندوق نجوم زارقة على كتفه
صح؟؟
عارفاه ابن الهرمة
طايح
---
تحياتي لقصتك القوية
:))
أنا متابعة جيده جدا لآخر المصطلحات العجيبة
الثانوية العامة والمذاكرة
***********************************
كل الحواديت دي حلوة ومفيش ولا واحدة
ملتوتة بجد
وجميل قوي البوستر الحلو بتاع وأعدوا.....
كمان الأغنية دي بتاعت منير جامدة
تحياتي
تفسيرك للقصة برضة سليم .. أصلها بتنطبق على حاجات كتيرة قوي في زماننا ده
متشكر قوى على ذوقك وإبقي شرفينا في القصة اللي جاية
بجد برافو عليكي إنك متابعة المصطلحات الحديثة .. الواحد بيبقى شكله وحش لما بيكون مش عارف لغة بلده ويفضل يسأل عن معاني الكلمات
ولا مقصر ولا حاجة .. إحنا اللي مقصرين معاك
ربنا يوفقك ونسمع عنك خير السنة دي إن شاء الله
متشكر على إطراءك الجميل
تعليقك ده أعتز بيه جدا لأنه دليل على إن اللي بأقصدة قدر يوصل للناس
متشكر مرة تانية
ربنا يكرمك .. متشكر جدا على التعليق الجميل ده
طريقك فين يامراكبى؟
رايح فين وجاى منين؟
هى مش مشاكل البلد هى مشاكلنا؟
وعيوب البلد هى عيوبنا؟
كل شىء فى الدنيا بيتغيرالا قانون التغير
سلام
حلوة جدا كعادتك طبعا
وغير متوقعة يا باشمهندس
ههههههه
بس بينى وبينك
تعبير دقيق اوى عن حالنا اليومين دوول
انت فكرك هايل بجد
تحياتى
:)
الدراع..الدراع ياسادة كله بالدراع
lol
ه انا متوقع منك حكايات تانية جامدة طحن..الفكرة اصلا حلوة وخلاقة تنفع على اكتر من ظاهرة تغير في حياتنا
تحياتي
أهلا بيك وشكرا على زيارتك الكريمة
أنا سواح في دنيا الله وشايل مصريتي معايا في كل حتة .. ونفسي تبقى مصر أحلى من كل الأماكن اللي بأروحها .. نفسي نطبق قانون التغيير ده بس للأحسن
ربنا يكرمك ومتشكر على ذوقك
أنا بجد سعيد جدا بإن الجميع عنده الفكر العالي ده وبيلقط كل لمحة وكل فكرة بسهولة
أهو شغل الدراع ده هو أكتر حاجة خليتني أمشي من مصر
ربنا يصلح الحال للناس وبعد كده حال البلد هينصلح لوحده
متشكر كتير على تعليقك الجميل
الكرش كله تحت أمرك .. متشكر على متابعتك الجميلة