شد القلوع يا مراكبي ... مافيش رجوع يا مراكبي

الاثنين، يناير 07، 2008

من يوميات متزوج الطبعة الرابعة

الواد ده خان خلاص .. وعلشان يتربى لازم يتجوز مراتي
بأموت من الضحك كل ما أسمع الجملة الرائعة دي في إعلان الفيلم اللي إسمه حين مسخرة .. قصدي حين ميسرة .. تقوم الحاجة مراتي تكشرلي وتقولي: ضحتك قوي الجملة دي؟ جت عالجرح وألا إيه؟ إنت متضايق مني قوي كده؟
أنا مدافعا: لا والله .. مش قصدي حاجة عليكي(أنا قصدي طبعا) أنا بس بأضحك على النكتة .. أصلها جامدة قوي و .. فجأة أفقد النطق أول ما بأشوف غادة عبد الرازق بتعمل حاجات كده مع سمية الخشاب في دور بأحسدها عليه (بأحسد غادة عبد الرازق طبعا) .. تباغني الحاجة وتصحيني من الحلم: إيه .. إتكتمت ليه مرة واحدة كده؟ عجبوك دول؟
أنا مدافعا تاني ولا كابتن الجوهري: لا والله .. ما بتعجبنيش الحاجات الوحشة دي (أنا بتعجبني طبعا) دول حتى ييجوا إيه جنب مطربات الفيديو كليب
الحاجة مراتي: يا سلام .. يعني إنت مش عينك بتطلع على هيفاء وهبي ونانسي عجرم؟
أنا مدافعا مدافعا مدافعا: لا بأحب دي ولا بأحب دي (أنا ما بحبش غير الغالية بس .. كارول سماحة) ما بأحبهمش
الحاجة مراتي: يعني بجد ما بتحبش نانسي عجرم؟
أنا مش مدافعا: أيوة ما بحبهاش
الحاجة مراتي: طيب عقابا ليك (مش عارف على إيه) مش هنسمع في كاسيت العربية غير نانسي عجرم بعد كده
أنا (وقلبي بيرقص من جوة): ماشي .. هأستحملها وخلاص .. ولو إني ما بأحبهاش
ومن ساعتها وأنا بأسمع شخبط شخابيط بقى لي إسبوعين
.

التسميات:

68 Comments:

Blogger خمسة فضفضة said...

السلام عليكمورحمة الله وبركاته

اول مره اول تعليق هنا
هيييييييييييه

الاثنين, يناير 07, 2008

 
Blogger خمسة فضفضة said...

مش عارفه يعني اعلق اقول ايه اكتر من انكم يا رجاله مش بيطمر فيكم ، الواحده مننا تبق ايادالكم صوابعها العشرة شمع وبرضو عنيكوا زايغه وبتبصوا بره

هييييييييه لنا رب اسمه الكريم

الاثنين, يناير 07, 2008

 
Blogger Ahmed Shokeir said...

:)

Post of the day

الاثنين, يناير 07, 2008

 
Blogger اسكندراني في الغربة said...

ههههههه بوست ميسرة خالص
رنا يخليلك اهل بيتك و يبعد عنك الدش و الي بيجي من وراة ( الدعوة لا تشمل شرايط الكاسيت)
:)

الاثنين, يناير 07, 2008

 
Blogger بنت القمر said...

ااااااااااااااااااااه
يامآمنه للرجال يا مآمنه للميه في الغربال
كلكو صنف واحد عجينه واحده
جينات كربونه مستنسخين من بعض
تجوز الحاجه وتبص لسميه
تاكل من ايد الحاجه وعينك علي هيفا
لو كعب الحاجه بان يجيلك الهسهس العصبي
وانت بتحلم بكارول
اووووف
سلملي علي الحاجه وحلال فيك شخبط شخابيط
ويا رب الشريط يسف كمان وتسمع وشششششششششش بس
تحياتي
وولو ها تزعل احسن
بس اديني موبايل الحاجه الاول
عاوزة اقولها كلمتين مصلحه
بوست وائعي خالص
منتهي الصدق الرجولي

الاثنين, يناير 07, 2008

 
Blogger محمود الدوح said...

ازيك يا استاذ احمد
بتسمع نانسى وبأمر من الرقابة العليا
امال لو الرقابة العليا مبتمحلكش تسمعها
هتعمل اية

الرقابة عندى مش مراتى لانى مش متجوز

الاثنين, يناير 07, 2008

 
Blogger عدى النهار said...

إيه الحكاية يا مراكبى كله دفاع فى دفاع مافيش هجوم خالص! كده ممكن تلاقى نفسك واقف جون بعد شوية

الاثنين, يناير 07, 2008

 
Blogger الأباصيرى said...

ياخوفى لدفاعك يبوظ منك فى مرة وتلاقلى نفسك على السلم.. أقصد دكة الأحتياط

نهايتة بوست جميل والأجمل انة بدون ريحة
:D

الاثنين, يناير 07, 2008

 
Blogger son's egypt said...

السلام عليكم
تصدق كتير من الافلام والاغاني
ممكن تكون سبب في حاجات كتيرة بتحصل جوه البيوت

الاثنين, يناير 07, 2008

 
Blogger إنـســـانـة said...

الله يسامحك

كدة انا اتأكدت ان كلكوووووووووا عنيكوا زايغة زى ما دكتورة فضفضة بتقول

ياعينى عليكى يا حاجة ياام مها ياختى
:(

الاثنين, يناير 07, 2008

 
Blogger Esmeralda said...

قشطه
كده بقي يا باشا كشفت خطه اللعب
احبها يعني مش باطقها
و اكرهها يعني باموووووووووت فى اللى خلفوها
مشكرين اوي , اهو الواحد ياخد خبره عشان المستقبل و كده يعني

الاثنين, يناير 07, 2008

 
Blogger zordeak said...

ههههههههههه

الله يكرمك انت وطهقان عرفتونا اللى فيها

تشكر يا زعييم

:D

الاثنين, يناير 07, 2008

 
Blogger لماضة said...

هههههههههه
هههههههه
ههههه
البوست ده فيه فن عالى اوى يا بشمهندس


والمعنى فى بطن الشاعر

الاثنين, يناير 07, 2008

 
Blogger мσнη∂ιš said...

سلام
بوست حلو بيحمل جواه معاناة أصبحت تتفشى في الأسر العربية، إبقى مررلي الكاسيت يا هندسة
سلام

الاثنين, يناير 07, 2008

 
Blogger esraa said...

هههههههه

شخبط شخابيط لخبط لخابيط مسك الالوان ورسم عالحيط

والله اغاني حلوه

(:

الثلاثاء, يناير 08, 2008

 
Blogger نقطة مية said...

عزيزي صاحب المدونة
عزيزتي صاحبة المدونة
========================
نتشرف بدعوتك لافتتاح
دار الكتب
هي حلم صاحب البوابة الذي تحقق
طريقة مبتكرة لتوثيق الكتب العربية و نشرها بين الناس بكل سهولة و يسر والدمج بين دور النشر المختلفة لسهولة البحث لاي قارىءوالنشر لاي كاتب
الافتتاح يوم الخميس 10-1-2008
في مكتبة البلد 31 شارع محمد محمود امام الجامعة الامريكية
الساعة السادسة مساءا
يلا نشارك مصطفى فرحته بتحقيق الحلم

الثلاثاء, يناير 08, 2008

 
Blogger دنــــيــــــا مـحـيـرانـي said...

ههههههههههههه
كلكوا صنف واحد زي القرع تمام
كارول سماحه ايه بس ذزق وحش خالص
طب قول باسكال او حتي ميرام
بس احسن حاجه انك بتنفيذ النصيحه
اه ه ه ه يا ني من الرجاله و عينهم

الثلاثاء, يناير 08, 2008

 
Blogger S H A H said...

يا سلام عليك يا مراكبي
فعلا انت مقلتش غير اللي بموت فيهم, مش كنت تفضل شوية كمان في الكويت كنا جمعنا الازواق الحلوة دي على بعض

الثلاثاء, يناير 08, 2008

 
Anonymous CresceNet said...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my site, it is about the CresceNet, I hope you enjoy. The address is http://www.provedorcrescenet.com . A hug.

الثلاثاء, يناير 08, 2008

 
Blogger رينـــــــــــا said...

السلام عليكم
ههههههههههههههههههههه فطستنى من الضحك
الصراحه النكته تضحك جدا
وبصراحه شديدددددددددة ان الرجل ليه حق عينه تزوغ من الحاجات اللى بيشوفها فى التليفزيووووووووون بس لو الواحد هيفكر بعقله والا واحدة من دولـــــه تفتح لراجل بيت وتستحمل ولاده

الثلاثاء, يناير 08, 2008

 
Blogger الساحرة الشريرة said...

طالما مش اد الكلام بتتكلم ليه اضحك في سرك لازم الحاجه تشوفك والنبي الحاجه مدلعاك وبتسمعك نانسي كانت المفروض تخليك تنفذ الاغنيه وتمسك الالوان وتشخبط علي الحيط وبعد كدة تنظفها علشان والحاجه قاعدة لازم تغمض عينيك رجاله عينيها زايغه

الثلاثاء, يناير 08, 2008

 
Blogger jehan said...

شوف يا مراكبى بجد الحاجة غلبانة وطيبة

بس سيبك انت انتوا عيلة زى العسل ربنا يحميكوا يارب

وهى الحياة تحلى وتبقى زى الفل الا اذا كانت فيها شوية حاجات من دى هههههههههههههههه

الثلاثاء, يناير 08, 2008

 
Blogger أميرة ويلز said...

هى الحاجة معدتش بتدخل نت والا ايه النظام

؟؟

الثلاثاء, يناير 08, 2008

 
Blogger david santos said...

Happy New Year! And best wishes for a healthy and successful 2008

الأربعاء, يناير 09, 2008

 
Blogger مبرمج حر said...

ههههههههههههههه
البوست دة المفروض كان يبقى اسمه
من يوميات متزوج الطبعة الرابعة
"كشف المستور"

بقة كدة تكشف الخطط والتسليح والنظم بتاعتنا هههههههههههههه .. هنحارب (أو ندافع) ازاى دلوقتى !!! .. على كل حال لسة فيه خطط كتييييييييييييييييييييييييير .. بقولك ايه قريت كتاب مستر هوبنز هههههههههههه

بوست جميببببببببببل ..
ربنا يسعدكم انت , والحاجة , والأولاد , ودايما يدخل السرور والفرحة والحب على قلوبكم

سلاماااااااات

الأربعاء, يناير 09, 2008

 
Blogger Nsreen Bsunee said...

احمد يا قاضى
ازيك وازى الحاجه والاولاد يارب كلكم بالف خير وكل سنه وانتم طيبين

شكرا يا كوتش على المعلومات القيمه
احنا بقينا خبره بسببك والله انت حتطلع جيل من الزوجات المحصنين اللى فاهمين وعارفين وقافشين

وكده الرجاله حيقاطعو المدونه يا معلم وممكن يعملو مدونه مضاده يهاجموك فيها

تحياتى يا موهبه

الأربعاء, يناير 09, 2008

 
Blogger loumi said...

هههههههههههههههه
ههههههههههههه
هههههههههه
إذا كانت كل الرجاله كده
وكل الستات كده
إيه إللي بيزعل الإتنين من بعض بس
حاجه غريبه

سلام كبير لك وللحاجه

الأربعاء, يناير 09, 2008

 
Blogger أُكتب بالرصاص said...

إيه يا باشمهندس
انت مش ناوي تجيبها البر

انا ليا رأي

زي الخضروات ما بتفقدها قيمتهاالغذائية بالطبيخ واشعال النار

نانسي عجرم بتفقد قيمتها الحقيقية لو انسمعت على الراديو فقط

نانسي
لازم صوت وصورة... وانت سيد العارفين

وكل سنة وعام هجري جديد
ومهاجرين نانسي وامثالها

الأربعاء, يناير 09, 2008

 
Blogger يا مراكبي said...

خمسة فضفضة

وعليكم السلام ورحمة الله وبركاتة

أهلا بيكي في أول تعليق يا دكتورة

وبعدين فين العين الزايغة دي؟ أنا لا عيني زايغة ولا حاجة .. أنا بريء جدا جدا .. الرجالة ما بيعرفوش يكدبوا زي ما إنتي عارفة

ههههههه



********************



Ahmed Shokeir

أهلا بيك .. نورتنا .. وأشكرك على الدعاية الجامدة قوي دي

تحياتي



*******************



اسكندراني في الغربة

إيه ده؟ وليه الدعاء مش بيشمل شرايط الكاسيت؟ هو الدعاء بتاعك ما بيشغلش غير السي دي والدي في دي بس وألا إيه؟

هههههه .. منورني



********************



بنت القمر

إيه ده .. كلة ضرب ضرب ما فيش شتيمة؟ هههههه

أنا مستعد أقبل منك أي حاجة إلا إنك تآخدي موبايل الحاجة وتكلميها .. مش خوف منها ولا حاجة .. أنا جامد جدا .. بس بلاش علشان نحقن الدماء .. دمائي أنا طبعا

هي قرت تعليقك وبتحبك لله في لله .. مش عارف ليه



********************



محمود الدوح

ٍإحمد ربنا إنك لسه ما عندكش رقابة .. وحاول تتمتع بالفيديو كليب والحاجات دي .. ربنا يكفيك تحكم الرقابة

ههههههه



*******************



عدى النهار

ما هو الدفاع خير وسيلة للهجوم زي ما إنت عارف .. وبعدين حارس مرمى أحسن من الطرد بره خالص .. مش كده؟ أصلي أنا جامد جدا في البيت .. إوعى تفتكر إني ضعيف ولا حاجة

ههههههه



*******************


الأباصيرى

السلم للرجالة يا معلم .. أنصحك بالتدريب عليه من دلوقت

هههههههه

إزاي ما فيش ريحة في البوست ده؟ ما شميتش ريحة البرفانات بتاعة سيدات الكليب العربي دول؟



********************

الأربعاء, يناير 09, 2008

 
Blogger يا مراكبي said...

son's egypt

وعليكم السلام ورحمة الله

طبعا أصدق .. أصدق قوي .. أصدق جدا .. إسألني أنا



********************



إنـســـانـة

مش كلنا عينينا زايغة ولا حاجة .. أنا قدامك أهو ما بأبصش على حاجة خالص

وبعدين بلاش سيرة مها دي .. خليكي محضر خير بقى

ههههههه



********************



Esmeralda

ههههه .. أيوة هي دي الشفرة .. بس خدي بالك أنا جيل قديم شوية وما أعرفش شفرة اليومين دول إيه

أي خدمة .. أدينا بنساعدكوا أهو .. المهم إنتوا تساعدونا بقى وتقولولنا سر الشفرة النسائية

ههههههه



********************



zordeak

إحنا بس بنحب ندي أمل للناس زي ما إنت عارف .. هو إحنا عايشين غير بالأمل .. ههههه

حمد الله عالسلامة .. غايب عن الساحة بقى لك كتير



********************



لماضة

طول عمر المعنى في بطن الشاعر .. بس الظاهر إن فيه ناس بتفتح بطنه وتعرف إيه اللي فيها .. مش كده يادكتورة يا بتاعة الجراحة؟

هههههه




********************



мσнη∂ιš

يا حبيبي إنت لسه عالبر .. يعني تقدر تسمع براحتك أغنية "أخاصمك آه" وأغنية "آه ونص" والروائع دي كلها .. أمثالي المتزوجين بقى هما اللي يسمعو "شخبط شخابيط" والحاجات دي عقابا لينا .. إلحق لك يومين يا معلم



********************

الأربعاء, يناير 09, 2008

 
Blogger يا مراكبي said...

esraa

أيوة أغاني حلوة .. بس الحاجات التانية أحلى

عجبتك قوي شخبط شخابيط دي؟
(:



********************


نقطة مية

شكرا للتنويه



*****************



دنــــيــــــا مـحـيـرانـي

إزاي بس كارول سماحة ذوق وحش؟ لازم تراعي إنها فوق الأربعين سنة ولسه بالشكل ده
هههههه

وبعدين أنا مش من اللي عينيهم زايغة .. ما تطلعيش عليا سمعة مش كويسة
هههههه



*******************



S H A H

طبعا لو أنا كنت لسة في الكويت كنا عملنا دماغ جامدة جدا .. عموما جمع إنت الأوراق الحلوة وأنا هأبقى أجيلك مخصوص

ههههههه



********************


CresceNet

شكرا جزيلا للزيارة والإهتمام



********************



رينـــــــــــا

وعليكم السلام ورحمة الله

أديكي إعترفتي إن لينا حق عينينا تزوغ .. ده الطبيعي جدا في الظروف دي يا فندم

لكن موضوع البيت والأولاد ده بقى فطبعا تنسيه مع المطربات دول .. مش هلاقي أحسن من الحاجة مراتي طبعا طبعا

نورتي


******************

الأربعاء, يناير 09, 2008

 
Blogger Hannoda said...

هههههههه

بقى كل ده و مش عارف العقاب على ايه؟؟؟

تحياتي للحاج و الحاجة
:)

الأربعاء, يناير 09, 2008

 
Blogger كراكيب عادل said...

حين مسخرة هههههههههههههههههههه

اما بقي عن التهمة الموجهة ليك دي من اصدقاءنا انك يعني لا مؤاخذة عينك زايغة انا هدافع عنك واقولك احنا كلنا معاك يا مراكبي خد راحتك خالص واعمل الي يريحك

بس يا خوفي تاخد كارت احمر

انا النهاردة هروح اسمع شخبط شخابيط دي تضامنا معاك مش علشان حاجة تاني
فية تقرير بيقولك ان هيفاء ونانسي سبب طلاق كتير من الستات

معقول الكلام دة ؟؟

الأربعاء, يناير 09, 2008

 
Blogger اسكندراني اوي said...

ههههههههههههههههه
عسل يا هندسه
والله عسسسسسسسسسسسسل
تقريبا يا سيدي الفاضل ان السيدات كلهن طبعه واحده
انا بقرأ اللي انت كاتبه وبقول ياااااربي شفت الحوار ده فين قبل كده

وش مسخسخخخخخخخخخخخخخ

تحياتي
ولكنا في الهوى سوى يا صديقي

الأربعاء, يناير 09, 2008

 
Blogger shreef said...

ضحكتني يا بشمهندس و الله و بعدين بصراحة

احم احم

عندك حق

سلام

الأربعاء, يناير 09, 2008

 
Blogger doha said...

يارب مراتك تقرا البوست ده
هههههههههه
هتبقى ليلة من احلى الليالى
وشخبط شخابيط لخبط لخابيط
مسك الالوان
ورسم ع الحيط
مش عارف الحيط هيبقى ليه دور فى الموضوع ده ولا ايه
ربنا يستر عليك

الخميس, يناير 10, 2008

 
Blogger شباب نفسه الناس تبقى سعيدة said...

أيه يا مراكبي ده
يا باشا أنت كبرت عالحاجات دي
وشكلك يا عيني تعبان قوي
أنت بقى سيبت للشباب أيه ولا دي رؤيتك لواقعنا المأزوم
اللي مششايفين فيه قدامنا غير سمية الخشاب ونانسي عجرم
بجد لازم نتغير ونبعد إهتمامنا عن القضية دي علشان نتقدم شوية
آه على فكرة يا حاج مراكبي الفيلم أسمه حين ميسرة لتكون نسيت والفيلم على فكرة قصه هايلة وفكرته جامدة لولا بس إن خالد يوسف زود حاجات مكنش محتاجها الفيلم لكن الفيلم عامة جامد
وأبقى أتفرج عليه وهتعرف إن ده كله بس لجذب الجمهور
تحياتي ليك ويا رب يرجعك لينا بالسلامة أنت والحاجة

الخميس, يناير 10, 2008

 
Blogger Mai Mohamed nagib .. said...

ببدل ماتكتب بوست يا مراكبي
حاول تتأقلم ع البيت
وشخبط شخابيط
ههههههههههههههههههههههههههههههههههههه
بجد بوست جامده والنبي خليك في شخبط شخابيط احسن من حين مسخره اقصد ميسره ..

الخميس, يناير 10, 2008

 
Blogger Rozza!.......فاقد الذاكرة said...

تحياتي
وذلك مثال على استخدام الرجل لزكائه ضد المرأة, فتسمح له بالممنوع ولكن برضاها.
ومن منا لا يكره نانسي عجرم (طبعا ولا حد)

الخميس, يناير 10, 2008

 
Blogger Gid-Do - جدو said...

يااحمد ياخويا انا نفسى اعرف لية الزوج لايعامل معاملة المساجين
حيث ان المسجون حسن السير والسلوك بيخرج من السجن بعد قضاء ثلاث ارباع المدة ـ فى حين الزوج محكوم علية حكم مطلق وكمان كاتمة على نفسة ـ وعلشان تعرف اد اية ان الازواج مظاليم قلت انزل مصر لوحدى ووافقت حرمنا المصون قطعت التذكرة رجعت فى كلمها بعدها وقالت فيها لاخفيها قلت مش دافع ولا مليم قالت حروح بفلوسى وعنها واشترت تذكرة ـ بقى دة مش كتم نفس جوة وبرة؟ ـ انا قررت اعتصم واطالب بحرية الزوج فى اجازة لوحدة مما يتيح له الفرجة من غير نكد على نانسى واخواتهاـ مين معايا؟

الخميس, يناير 10, 2008

 
Blogger malak said...

كله دفاع دفاع انت كنت واقف حارس مرمى كدا

اه منكم
ربنا يكفينا شر الدش والسينما واللى بيجى منها
بس بجد بوست حلو اوى

تحياتى

الخميس, يناير 10, 2008

 
Blogger يا مراكبي said...

الساحرة الشريرة

أنا قلت برضه إن الساحرة الشريرة هتقف في صف الحاجة ضدي .. بقى بأسمع شخبط شخابيط وتبقى مدلعاني؟ أمال لو معاقباني هأسمع إيه؟

عموما وأنا قاعد مع الحاجة هأعمل بنصيجتك وهأغمض عينيا .. بس أعمل إيه بقى في عقلي الباطن؟ أغمضه إزاي ده؟

هههههه



*******************



jehan

وأنا كمان طيب وغلبان قوي .. ما يغركيش الكلام اللي في البوست ده

وزي ما قلتي .. الحياة بتبقى أحلى لو فيها شوية حاجات زي كده .. وتبقى أحلى أكتر لو كلها كده

ههههههه



********************



أميرة ويلز

لأ طبعا .. ده الحاجة عاملة عليا مخابرات في الإنترنت ولا أجدعها سي آب إيه

ههههههه



******************



david santos

Thank you very much and happy new year




******************


مبرمج حر

البوست نسميه زي ما إنت عايز يا معلم .. المهم يعيش

ومين مستر هوبيز ده؟ ده مزين ده؟

ههههههه

ربنا يكرمك ويسعدك إنت كمان



*******************


Nsreen Bsunee

أي خدمة .. المهم تقفوا جنبي لما أتحدف بالطماطم وعلب العصير الفاضية .. مش تاكلوني لحم وترموني عضم

أخوكم وبيشرفكم

متشكر قوي على الإطراء



*******************



loumi

قوليلهم والنبي .. أهو ده كلام الناس العاقلين .. إنتي فين من زمان؟

منورة بجد



*******************



أُكتب بالرصاص

حمد الله عالسلامة .. كنت غايب فين؟

تعرف إني أول مرة آخد بالي إن أسوأ عقاب إنك تسمع نانسي عجرم على الراديو؟

فكرتني بالنكتة بتاعة الصعيدي اللي بيدور على كليب هيفاء وهبي على قناة إقرأ



******************


Hannoda

أيوة مش عارف العقاب على إيه .. أفيدونا أفادكم الله

خطوة عزيزة بجد



****************


كراكيب عادل

أخويا وحبيبي اللي دايما ساندني وواقف جنبي .. أحييك تحية جامدة جدا جدا من أرض الكفاح والنضال

بجد فيه حالات طلاق بسبب هيفاء ونانسي؟ ياراجل بجد الكلام ده؟ ليه؟ وعلشان إيه؟ هه؟ قول ما تتكسفش

منورني



*****************



اسكندراني اوي

إنت شكلك كده من الرجالة اللي عينيهم زايغة وممكن كده تبوظ أخلاقي وألا حاجة .. أنا ياعم ماليش في الحاجات دي

هههههههه

الحوار ده برضه كان عندك في البيت؟ حاجة غريبة فعلا



******************



shreef

أحييك على الإحم الجميلة دي

إحم إحم جامدة قوي كمان

إحم إحم



*****************



doha

الحاجة قرت البوست وأنا ما يهمنيش أبدا .. أنا جامد جدا جدا

أحييك من عنبر الكسور بمستشفى الجراحة



****************



شباب نفسه الناس تبقى سعيدة

إيه كبرت دي؟ ده أنا لسه صغنون وعلى وش جواز .. إنت هتقولي نفس الكلام اللي بتقوله الحاجة ليا وألا إيه؟

أنا مش فاكر آخر مرة دخلت فيها سينما إمتى .. بس هأحاول أعمل بنصيحتك وأشوف الفيلم على إذاعة الإف إم .. علشان بس أحمي نفسي من فتنة المناظر

هههههه



******************



Mai Mohamed nagib

طبعا .. مين يشهد للعروسة؟

أديني عايش مع الشخبط شخابيط أهو لحد ما نشوف آخرتها إيه

نورتي



*****************



Rozza!.......فاقد الذاكرة

هو مش ذكاء قوي يعني .. دي غرائز بالفطرة كده يا معلم

منورني يا صديق الكفاح



*****************
Gid-Do - جدو

كلنا معاك يا جدو يا زعيم الأزواج المطحونين في الأرض وتحت الأرض كمان

أنا لو منك أعمل تمويه وأغير ميعاد الحجز وما تقلهاش غير وإنتو في المطار بعد ما هي تعمل بوردينج .. وقضي إنت يومين في تكساس إتفرج فيهم على اللي نفسك فيه من زمان .. ونفسنا كلنا فيه

ربنا يستر عليك يا جدو



*******************



malak

النهاردة حارس مرمى .. ربنا يستر وما أقعدش على دكة الإحتياطي بعد كده

بلاش تدعى على الدش حرام عليكي .. ده هو اللي مفرح ناس كتير قوي في الدنيا دي

نورتينا

الجمعة, يناير 11, 2008

 
Blogger شيمـــــاء said...

هو انت مسحت التعليق بتاعى علشان مناصر للحاجة ولا ايه ؟؟؟

الجمعة, يناير 11, 2008

 
Blogger يا مراكبي said...

شيماء

فين التعليق اللي أنا مسحته ده؟ إنتي هتلبسيني تهمة وألا إيه؟ فتشيني

أنا ما بأخافش من أي تعليق يناصر الحاجة .. أنا مش خايف .. أصلها نايمة دلوقت

الجمعة, يناير 11, 2008

 
Blogger بثينــــــة said...

حبيت بس اعلق تعليق موضوعى غلس
بطلات الفيلم يا سيدى اللى عينك هتطلع عليهم مطلوب عرضهم على النيابة بتهمة اللى اسمه ايه دة
افساد الاخلاق
دى اخبار طازة من مصر علشان بس الحاجة تعرف ان وراها رجالة هنا

وبعدين مالها شخابيط
:)
انصح الحاجة كمان بأغنية
اللى بيسمع كلمة أهله شو بنقله
:))

الجمعة, يناير 11, 2008

 
Blogger شاب مصري مفروس said...

ههههههههههههه

والله بوست جامد اوي

بس خلى بالك بقي للحاجة تدخل المدونة

مش هيبقي كويس عشانك

الجمعة, يناير 11, 2008

 
Blogger عبدالله المصري said...

بسم الله الرحمن الرحيم

والحمد لله رب العالمين والصلاة والسلام على خاتم المرسلين سيدنا محمد وعلى آله وصحبه .


إلى كل إخواني مخلص لله لا للجماعة


بداية وقبل أن يستفزك العنوان فتضعنى فى خانة لا أنتمى إليها علينا أن نحدد بعض المسلمات التى تؤمن بها وأؤمن بها لتتبين لك من خلالها مرجعية محدثك .
- فكلانا يؤمن بالله وملائكته وكتبه ورسله واليوم الآخر وكلانا يعشق هذا البلد عشقه للأمانة التى وهبه الله إياها واستحفظه عليها ليرى كيف يفعل بها , وكلانا يموت حزنا وكمدا على ما أصاب أهل هذا البلد من فقر وقهر وظلم وعلى أتم استعداد لبذل المال والنفس والولد لإصلاح شأنه وحمايته من كيد أعدائه وتخاذل أبنائه , وكلانا يؤمن بحتمية الحل الإسلامي وبأن أي محاولة إصلاحية على أسس غير إسلامية لن تكون إلا مرحلة جديدة من الضياع والتخبط والخذلان .

واتفاقنا على مثل هذه المسلمات ووفق أي تصنيف ديني أو سياسي أو حتى إنساني لابد وان يجعلنا فى جبهة واحدة , عدونا واحد وصديقنا واحد وهدفنا واحد وقيادتنا واحدة , إلا أننا لسنا كذلك وأنت السبب فى ذلك .
وقبل أن أسهب فى حديثى أذكرك بان الحكمة هى ضالة المؤمن أينما وجدها فهو أحق الناس بها , وأن كل إنسان مهما علا شأنه يؤخذ منه ويرد عليه إلا رسول الله صلى الله عليه وسلم , ولأنك بشر مثلى ولان قياداتك بشر أمثالنا فاحتمال الخطأ وارد فى توجهاتها وقراراتها وأفكارها .
لذلك فان انتقدت الإخوان فكرا أو عملا أو من حيث شرعية الوجود أصلا ودعمت نقدى بثوابت الكتاب والسنة دون مواربة أو هوى فقد أقمت عليك الحجة وألزمتك أمام الله وأمام نفسك المؤمنة بإتباع الحق الذى عرفته بالحجة , وذلك لأنك مؤمن وليس للمؤمن أن يختار بعد أمر الله ورسوله .
وحديثى هذا إليك من باب التواصى بالحق الذى أمر به الله تعالى عباده المؤمنين ليظلوا متآلفين متوحدين .
والحق حق الله فى حاكمية دينه على أرضه وبين خلقه , الحق حق الأمة فى السيادة على نفسها وإنفاذ إرادتها , الحق حق الناس فى التخلص من سلطان الفقر والقهر واستعادة ما كفله الله لهم من حقوق لا تستقيم حياتهم إلا بها .
فاسمع يا أخى من عبد فقير ورجل من عموم المسلمين لا يريد إلا الخير لك ولوطنه ولأمته ولنفسه فى الدنيا والآخرة فإنى محدثك حديث عظيم , إن استجبت له فقد غيرنا سويا وجه مصر والأرض من حولها بفضل الله ومنته وتصديقا لسننه ويقينا بنصره لعباده المؤمنين , وان أعرضت عنه بعد أن تبين لك الحق وأقيمت عليك الحجة فأنت أعلم بعاقبة أمرك فتربص حتى يأتي الله بأمره , وذلك لان الحق واحد لا يتعدد كما يتعدد الباطل واضح وضوح الشمس التى لا ينكرها إلا من أعمى الله بصره أو تكبر عن الخضوع للحق .

أما ما أتهمك به وأقدم له بكل ما سبق من مقدمات فهو انك وجماعتك أهل باطل ولستم على الحق فى شيء , ولم ولن تكونوا حلا لمشكلة مصر أو الأمة , ولستم جماعة الحق التى وعدها الله بالنصر والتمكين والاستخلاف فى الأرض , فما انتم إلا فرقة من فرق الباطل الهالكة وان ألبست ثوب الإسلام , بل انتم سبب نفور الناس من الإسلام واصل خوفهم من الاحتكام لشريعته ويشترك معكم فى ذلك كل الفرق الإسلامية التى تبغضونها وتبغضكم وتنكرونها وتنكركم , فانتم أصل الداء وفيكم إن شئتم الدواء .

كان هذا هو اتهامي لجماعة الإخوان وعلى الآن أن أثبته , وأسألك أن توفر سبى ولعنى إلى نهاية الرسالة فربما وجدتنى مصيبا وبدا لك منى من العلم ما لم تكن تعلمه فتحمد الله وتدعو لى .

وقبل أن اشرع فى حديثى وللإيضاح , فاعلم أنني لا انتقد الإخوان من حيث الأفعال والمواقف والتوجهات كما يفعل الكثيرون , وان كان فى أفعالكم ومواقفكم وتوجهاتكم ما يستحق النقد .
كذلك فإني لا أفتش فى صفحات الإخوان السوداء وتاريخهم المليء بالخطايا كما يفعل البعض وان كنت اعلم بوجود مثل هذه الصفحات والخطايا .
وإنما ينصب حديثى على شرعية وجود الإخوان من الأصل , فان كان وجودكم غير شرعي –وهو ما أقوم بإثباته- فان كل ما ينتج عنه من أفعال ومواقف يكون فاسدا بالتبعية حتى ولو كانت مواقف سليمة شرعا , وذلك لان الغاية لا تبرر الوسيلة فى شرع المسلمين .
ولكن ما الذى يجعل وجود الإخوان كجماعة غير شرعي ويبطل أعمالهم وينزع منها البركة ويحرمهم من التمكين الذى وعد الله به عباده المؤمنين بعد أن تجاوز عمر دعوتهم السبعين عاما ؟!
انه إصرارهم على مفارقة الحق الذى لا ينكره إلا كل جاحد مستكبر , وهو أن توحيد الخالق عز وجل وإفراده بالعبادة يستوجب بالضرورة توحيد جماعة المسلمين الموحدين , وذلك لان الإله الذى وحدوه أعطى الموحدين أوامر ثابتة ونهاهم عن أمور بعينها فوضع بذلك منهجا شاملا كاملا واضحا لا يختلف المؤمنون المخلصون لله ورسوله على ذرة من مكوناته .
ولكن واقع الحال الذى نحياه يثبت وجود عشرات الفرق المتنافرة المتناحرة الموصوفة زورا بالإسلامية والتى يكيد بعضها لبعض ويلعن بعضها بعضا ويدعى كل منهم انه الممثل الوحيد لشرع الله والمدافع الأول عن سنة رسوله صلى الله عليه وسلم وان ماعداه باطلا بالكلية , وهكذا تفعلون أيضا .
وهكذا تجزأ الدين وتفرق بينكم وبين غيركم من الفرق , فرأيتم أن طريق الإصلاح يأتى من قمة الهرم فأخذتم من الدين ما يتعلق بالحكم والسياسة ودخلتم إلى اللعبة السياسية طامحين إلى تغيير قواعدها والفوز فيها , فإذا بها هي التى تغير قواعدكم الشرعية وتجبركم على تقديم التنازل تلو التنازل , ورغم ذلك لم يقبلكم باقى اللاعبين ولا جمهور المتفرجين !
ورأى غيركم أن التمكين لن يكون إلا إذا بلغنا درجة الصحابة والسلف من البر والتقوى , فأغلقوا عليهم أبواب صوامعهم وتنافسوا فى قصر الثوب وطول اللحية وتعاملوا مع الناس بتعال وتكبر على اعتبار أنهم هم الصديقون وما سواهم رعاع منافقون !
ورأى آخرون أن طريق الإصلاح والتمكين لشرع الله لن يكون إلا بالأمر بالمعروف والنهي عن المنكر وتبليغ أفراد المجتمع بأوامر الدين ونواهيه على الرغم من جهلهم أو قلة علمهم فابتدعوا البدع فضلوا وأضلوا !
ورأى غيرهم كفر المجتمع حكاما ومحكومين فهجره أو قاتله , ورأى غيركم وغيرهم ما رأى وجعل من رؤيته نموذجا لصحيح الدين والواجب المرحلي الذى يجب على كل مسلم أن يلتزم به , وهكذا تعددت الفرق بتعدد الرؤى وسعى كل منهم إلى إظهار منهجه على باقى المناهج واستقطاب العدد الأكبر من المريدين والأتباع وهو ما أدى إلى زيادة فرقتهم وخلافاتهم واتهاماتهم لبعضهم البعض , حتى صارت هذه الفرق والجماعات هى السد المنيع والحاجز الأكبر بين المسلمين والإسلام , فقد نفروا الناس من الدين بخلافاتهم وبدعهم وعبادتهم لأئمتهم ومذاهبهم .

فالله أسألكم ... ماذا يفعل رجل من عوام المسلمين يحب الله ورسوله وينفطر قلبه حزنا وألما على حال المسلمين ولا يرى له هدفا فى الحياة سوى تحكيم شريعة الله فى أرضه , إلى أي جماعة ينضم ومع من من الإسلاميين المتعددين المتعادين يعمل ؟!!
فمع من منكم الحق الذى يرضاه الله ورسوله يا من تدعون أنكم أنصار الله ورسوله ؟
وبطبيعة الحال سيقول الإخوان أن الحق معهم وسيقول غيرهم نفس مقولتهم وذلك على الرغم من أن الحق واحد لا يتعدد كما يتعدد الباطل وذلك لأنه يمثل السبيل الوحيد لرب العالمين , يقول تعالى : (وَأَنَّ هَذَا صِرَاطِي مُسْتَقِيمًا فَاتَّبِعُوهُ وَلاَ تَتَّبِعُواْ السُّبُلَ فَتَفَرَّقَ بِكُمْ عَن سَبِيلِهِ ذَلِكُمْ وَصَّاكُم بِهِ لَعَلَّكُمْ تَتَّقُون ). الأنعام 153ويروى أن الرسول صلى الله عليه وسلم خط خطا على الأرض ثم قال : ( هذا سبيل الله ) ثم خط خطوطا عن يمينه وعن يساره ثم قال : ( هذه سبل على كل سبيل منها شيطان يدعو إليه ) رواه أحمد .ولأن الحق واحد لا يتعدد فمن البديهي أن يكون أتباعه موحدين فى جماعة واحدة بحكم ولائهم للحق الواحد , ولأن الباطل متعدد فمن البديهي أن يكون أتباعه متفرقين فى جماعات مختلفة بحكم ولاءاتهم المتعددة .

لذلك كان اختلاف أهل الحق المكلفين بحمله والتوحد فى سبيله وتفرقهم فى جماعات ومذاهب مؤذنا بوقوع الفتنة وخروجهم جميعا من تحت لواء الحق وإضافتهم كجبهات جديدة للباطل , وهو ما يعنى تعطيل فاعلية الضمان الإلهي الممنوح لهم بالنصر والتمكين والاستخلاف فى الأرض لافتقادهم أهم شروطه وهو إقامة جماعتهم الواحدة الموحدة .

وصدق الرسول الكريم صلى الله عليه وسلم الذى قال عن أمثالكم وعنكم من المتفرقين فى الدين المتبعين لأهوائهم :(َ افْتَرَقَتِ الْيَهُودُ عَلَى إِحْدَى وَسَبْعِينَ فِرْقَةً فَوَاحِدَةٌ فِي الْجَنَّةِ وَسَبْعُونَ فِي النَّارِ وَافْتَرَقَتِ النَّصَارَى عَلَى ثِنْتَيْنِ وَسَبْعِينَ فِرْقَةً فَإِحْدَى وَسَبْعُونَ فِي النَّارِ وَوَاحِدَةٌ فِي الْجَنَّةِ وَالَّذِي نَفْسُ مُحَمَّدٍ بِيَدِهِ لَتَفْتَرِقَنَّ أُمَّتِي عَلَى ثَلَاثٍ وَسَبْعِينَ فِرْقَةً وَاحِدَةٌ فِي الْجَنَّةِ وَثِنْتَانِ وَسَبْعُونَ فِي النَّارِ قِيلَ يَا رَسُولَ اللَّهِ مَنْ هُمْ قَالَ الْجَمَاعَةُ ) ابن ماجة وأبو داوود و الترمذي .

واعلم أن هناك من شيوخكم العظام (عندكم فحسب) من يضعف هذا الحديث ويقول بجرأة لا يحسد عليها انه غير مقتنع به , فهل يقنعه ويقنعكم كلام الله عز وجل؟!!
يقول رب العزة فإذا قال رب العالمين : (شَرَعَ لَكُم مِّنَ الدِّينِ مَا وَصَّى بِهِ نُوحًا وَالَّذِي أَوْحَيْنَا إِلَيْكَ وَمَا وَصَّيْنَا بِهِ إِبْرَاهِيمَ وَمُوسَى وَعِيسَى أَنْ أَقِيمُوا الدِّينَ وَلَا تَتَفَرَّقُوا فِيهِ كَبُرَ عَلَى الْمُشْرِكِينَ مَا تَدْعُوهُمْ إِلَيْهِ اللَّهُ يَجْتَبِي إِلَيْهِ مَن يَشَاء وَيَهْدِي إِلَيْهِ مَن يُنِيبُ ، وَمَا تَفَرَّقُوا إِلَّا مِن بَعْدِ مَا جَاءهُمُ الْعِلْمُ بَغْيًا بَيْنَهُمْ وَلَوْلَا كَلِمَةٌ سَبَقَتْ مِن رَّبِّكَ إِلَى أَجَلٍ مُّسَمًّى لَّقُضِيَ بَيْنَهُمْ وَإِنَّ الَّذِينَ أُورِثُوا الْكِتَابَ مِن بَعْدِهِمْ لَفِي شَكٍّ مِّنْهُ مُرِيبٍ ، فَلِذَلِكَ فَادْعُ وَاسْتَقِمْ كَمَا أُمِرْتَ وَلَا تَتَّبِعْ أَهْوَاءهُمْ ) الشورى 13-15
ولو لم يكن هناك بالكتاب والسنة غير هذه الآيات لكانت هي الكافية الجامعة القاطعة , فمنها يثبت أن دين الرسل جميعا واحد , حيث بدأ الله تعالى بأول الرسل وهو نوح ثم محمد صلى الله عليه وسلم وهو آخر الرسل ، ثم مر بمن بينهما من رسل وهم إبراهيم وموسى وعيسى , فما هو الذي شرعه لنا رب العالمين من عهد نوح عليه السلام إلى عهد سيدنا محمد صلى الله عليه وسلم ؟
ويأتي جواب ربنا (أَنْ أَقِيمُوا الدِّينَ وَلَا تَتَفَرَّقُوا فِيه ) وهذا أمر الله لنا ولمن سبقنا من الأمم , أن نقيم الدين في حياتنا بتنفيذ أحكامه وألا نتفرق فيه , وفي ذلك أمر بالجماعة و الائتلاف ونهي عن الفرقة والاختلاف , ثم يبين رب العالمين لنا من من الناس يصعب عليه الانصياع لهذا الأمر أو التشريع بقوله تعالى : (كَبُرَ عَلَى الْمُشْرِكِينَ مَا تَدْعُوهُمْ إِلَيْه ) , وفي هذا خطر عظيم على أتباع تلك الجماعات , ثم يخبرنا أنه تعالى يجتبي إليه من يشاء أي يختار , فالاجتباء اختيار , ولكنه يهدي إليه من ينيب أي من أراد الهداية , الذي يعود إلى الله إذا أخطأ , ويتبع الحق حيثما وجده وليس أسيرا لفكر أو مذهب أو إمام إن هلك أهلكه معه , ثم يخبرنا رب العالمين أن الذين تفرقوا ما تفرقوا إلا من بعد ما جاءهم العلم , وما كانت تلك الفرقة والاختلاف إلا بغيا بينهم , أي أنها ليست من العلم الذي جاءهم , ثم يخبرنا انه لولا أننا في اختبار له مدة لا يعلمها إلا الله يبعثنا بعدها ليحاسبنا على ما فعلنا في حياتنا الدنيا لقضي بين هؤلاء المتفرقين المختلفين .
ثم يأمر رسوله صلى الله عليه وسلم ومن اتبعه أن يدعو لذلك الأمر وهو إقامة الدين وعدم التفرق فيه وأن يستقيم كما أمر ولا يتبع أهواءهم , , فهذا هو الأصل والرسالة والدين الذي شرعه الله للناس على مر العصور , هذا هو واجب الإنسان على وجه الأرض و أساس حسابه يوم القيامة إقامة الدين وعدم التفرق فيه .
ويقول رب العزة (وَلَا تَكُونُوا مِنَ الْمُشْرِكِينَ ، مِنَ الَّذِينَ فَرَّقُوا دِينَهُمْ وَكَانُوا شِيَعًا كُلُّ حِزْبٍ بِمَا لَدَيْهِمْ فَرِحُونَ ) الروم 31-32
والآية خطيرة وتضع حكما مرعبا للذين فرقوا دينهم وكانوا جماعات أو أحزابا , كل منها يظن أنه على الحق ويفرح بما عنده و ينكر ما عند الآخرين ولو كان من الدين .
فإن قلت لي لا تكن من الأغبياء الذين يفعلون كذا , فإن أنا فعلت ذلك الفعل الذي نهيتني عنه أكن من الأغبياء , فإن قلت لي مثلا لا تكن من المقصرين الذين ينامون عن صلاة الفجر ثم نمت عنها فأنا ولابد من المقصرين .
ولله المثل الأعلى , فقد نهانا أن نكون من المشركين الذين فرقوا دينهم وكانوا شيعا وعلى ذلك فإن من يفعل منا ذلك أي يتفرق في الدين ويتشيع ويختلف صار من المشركين .
ويقول الله عز وجل : ( وَإِنَّ هَذِهِ أُمَّتُكُمْ أُمَّةً وَاحِدَةً وَأَنَا رَبُّكُمْ فَاتَّقُون ، فَتَقَطَّعُوا أَمْرَهُم بَيْنَهُمْ زُبُرًا كُلُّ حِزْبٍ بِمَا لَدَيْهِمْ فَرِحُونَ) المؤمنون ( 52- 53 )
فنفهم من الآية أن أمتنا أي امة التوحيد هي أمة واحدة , لها مواصفات ثابتة حددها رب العالمين , ولكنهم تفرقوا وقطعوا أمرهم ودينهم بينهم إلى ملل و مناهج هي في الأصل من الدين , وفرح كل منهم بما لديه وما هو عليه .
وقوله تعالى : (وَلاَ تَكُونُواْ كَالَّذِينَ تَفَرَّقُواْ وَاخْتَلَفُواْ مِن بَعْدِ مَا جَاءهُمُ الْبَيِّنَاتُ وَأُوْلَئِكَ لَهُمْ عَذَابٌ عَظِيمٌ ) آل عمران 105
وقوله تعالى : (إِنَّ الَّذِينَ فَرَّقُواْ دِينَهُمْ وَكَانُواْ شِيَعًا لَّسْتَ مِنْهُمْ فِي شَيْءٍ إِنَّمَا أَمْرُهُمْ إِلَى اللّهِ ثُمَّ يُنَبِّئُهُم بِمَا كَانُواْ يَفْعَلُونَ ) الأنعام 109
وقد روي أبو هريرة عن النبي صلى الله عليه وسلم في هذه الآية أن الذين فرقوا دينهم هم أهل البدع والشبهات وأهل الضلالة من هذه الأمة , وعنه أن النبي صلى الله عليه وسلم قرأ الآية هكذا ( إن الذين فارقوا دينهم ) , وكان على كرم الله وجهه يقول: والله ما فرقوه ولكن فارقوه يقصد الدين .
أبعد كل هذه الآيات الواضحة المخيفة يبقى لك كأحد أتباع تلك الجماعات أي مبرر أو عذر للبقاء على حالهم , ربما كان منهم من لا يقتنع إلا إذا قلت له مقولة لأحد كبار شيوخ الإسلام عبر عصوره تؤيد بها رأيك وان كنت قد دعمته بثوابت الكتاب والسنة ولا حول ولا قوة إلا بالله , ولهذا نذكر جزءا من كلام شيخ الإسلام ابن تيمية عله يحمل الشفاء .
فيقول ابن تيمية : ( واعلم أن أكثر الاختلاف بين الأمة الذي يورث الأهواء تجده من هذا الضرب , وهو أن يكون كل واحد من المختلفين مصيبا فيما يثبته أو في بعضه مخطئا في نفي ما عليه الآخر .
فإن أكثر الجهل إنما يقع في النفي الذي هو الجحود والتكذيب لا في الإثبات , لأن إحاطة الإنسان بما يثبته أيسر من إحاطتة بما ينفيه .
فباب الفساد الذي وقع في هذه الأمة هو التفرق والاختلاف , وبلاد الشرق من أسباب تسليط الله التتر عليها كثرة التفرق والفتن بينهم في المذاهب وغيرها حتى تجد المنتسب إلى الشافعي يتعصب لمذهبه على مذهب أبي حنيفة حتى يخرج عن الدين والمنتسب إلى أبي حنيفة يتعصب لمذهبه على مذهب الشافعي وغيره حتى يخرج من الدين , والمنتسب إلى احمد يتعصب لمذهبه على مذهب هذا أو هذا , وكل هذا من التفرق والاختلاف الذي نهي الله ورسوله عنه , وكل هؤلاء المتعصبين بالباطل المتبعين الظن وما تهوى الأنفس , المتبعين لأهوائهم بغير هدي من الله مستحقون للذم والعقاب .
فإن الاعتصام بالجماعة والائتلاف من أصول الدين , والفرع المتنازع فيه من الفروع الخفية فكيف يقدح في الأصل بحفظ الفرع ؟!) .

وبعد هذه الآيات القرآنية والأحاديث النبوية والكلام الثمين لشيخ الإسلام ابن تيمية لا يسعنى إلا أن أذكرك ان كنت لا زلت ترى فى جماعتك الأفضلية , بأنه يسوغ ترك الأفضل لتأليف القلوب , مثلما ترك النبي صلى الله عليه وسلم إعادة بناء البيت الحرام على قواعد إبراهيم عليه السلام لأن أهل قريش كانوا حديثي عهد بالجاهلية وخشي تنفيرهم بذلك , ورأى أن مصلحة الاجتماع والائتلاف مقدمة على مصلحة البناء على قواعد إبراهيم عليه السلام .

ألا هل بلغت , اللهم فاشهد
والسلام على من اتبع الهدى

الجمعة, يناير 11, 2008

 
Blogger من القلب said...

صباح الخير
دى اول زيارة لى عندك و ضحكت اوى وانا متخيلة الحاجة بتبصلك و نانسى بتقول
اعمل ايه واياك يا حمادة ..اللى عملته ده اسوء عادة

انا بالصدفة كاتبة موضوع عن موقفك ده و فيه صورة لنانسى كمان ;)

الجمعة, يناير 11, 2008

 
Blogger Amr Ahmed said...

هههههههههههه

والله عسل يا باشمهندس

الجمعة, يناير 11, 2008

 
Blogger يا مراكبي said...

بثينــــــة

مين بس اللي قاللك إن عيني هتطلع على بطلات الفيلم؟ أنا كل نظراتي بريئة جدا

أنا دايما ملاحظ إن الحاجة وراها رجالة وستات كتير مش عارف ليه .. المتطزعين كتروا قوي اليومين دول

أنا مش محتاج الأغنية التانية دي على فكرة .. أنا بأسمع كلمة أهلي من 35 سنة لحد ما بقوا يقولولي .. شاطر شاطر

:)



*****************************


شاب مصري مفروس

الحاجة بتقرأ فعلا المدونة .. وبصراحة أنا من يوم ما إفتتحت المدونة وأنا كل أيامي مش كويسه والحمد لله .. هههههههههه

منور



**********************


عبدالله المصري

يرجى مراعاة أن المقام لم يكن مناسبا لذلك المقال


******************************
من القلب
غنتي شكلك كده تعرفي الحاجة وألا حاجة .. صح؟

أنا هآجي مدونتك حالا .. مادام فيها صورة نانسي عجرم

ههههههه



***********************



Amr Ahmed

متشكر جدا .. منورني دايما

الجمعة, يناير 11, 2008

 
Blogger daktara said...

هاهاهاها
very
funny
ost
sorry
ihave
roblem
withkeyboard

الجمعة, يناير 11, 2008

 
Blogger بحبك يامصر said...

كده يامراكبى كشفت سرنا؟
خلاص خططنا كرجاله اتكشفت مش هنعرف نضحك عليهم تانى

الجمعة, يناير 11, 2008

 
Blogger بيتنا القديم said...

خلبوووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووص
كبير
يا حاج
ومدافع لا يشق له غبار
كوبانية الرجال ونقابة الاحرار بتحييك
دمت زخراً لتلاتة مليار رجل ما بيحبوش
لا دي ولا دي..غير دي..!!
(:
دمت مرزقاً دوماً..!!
يا نمس!

السبت, يناير 12, 2008

 
Blogger Gid-Do - جدو said...

يااحمد

صحصح معايا... اقولك اتفرج على نانسى واخوتها تقولى قضي إنت يومين في تكساس إتفرج فيهم على اللي نفسك فيه من زمان .. ونفسنا كلنا فيه

بتوع تكساس غلابة موظفين بالساعة سببوبة علشان ياكلوا عيش لكن ياابوحميد ياخويا نانسى واخواتها مواهب اية ومؤهلات اية ـ حتى ولو كانوا مؤهلات سليكون ـ ومتنساش مش كل من ركب الحصان خيال ـ نانسى واخوتها خيالة ياباشا يروحوا فيهم فين غلابة تكساس ... فهمت الفولة؟

السبت, يناير 12, 2008

 
Blogger MKSARAT SAYED SAAD said...

كل شئ جميل دون ارادة منا ننجذب الية وايضا الممنوع مرغوب بهدف الوصول لغموض هذا الشئ
جميل المغزي الموجود خلف كلماتك
وهنيئا لك شخبط شخبيط
تحياتي ومودتى

الأحد, يناير 13, 2008

 
Blogger يا مراكبي said...

daktara

ألف شكر يا دكترة .. منورنا والله .. وسلامة الكي بورد ألف سلامة



*****************



بحبك يامصر

إحنا مفضوحين أصلا ومن غير ما نآخد بالنا .. دول عارفين كل حاجة ومدكنين .. إسألني أنا

هما بيحبوا يخلونا نحس إننا بنضحك عليهم



*****************



بيتنا القديم

ياراجل .. كده تطلع عليا سمهة إني أنا خلبوص وحاجات كده؟ ده أنا في منتهى البراءة اللي ممكن تتخيلها .. وبعدين أنا قلت بعضمة لساني إني ما بأحبهمش .. أنا بأموت فيهم بس

منورنا بجد



************************



Gid-Do - جدو

طول عمرك خبرة وبعيد النظر يا جدو .. أنا دورت كلامك في دماغي وقعدت أفتكر كل الحاجات إياها اللي شفتها في أمريكا .. لقيت إن هيفاء وهبي تضربهم بالصرمة القديمة

عندي ليك حل أحسن .. تسيب المدام تنزل لوحدها .. وبعدين لما هي ترجع أمريكا تقوم إنت نازل مصر لوحدك .. وتحضر كل حفلات الأخوات الفاضلات دول .. صدقني هتلاقيها ولا أجدعها ستربتيز



*********************



MKSARAT SAYED SAAD

جميل تعليقك ده .. هو كمان فيه تلميحات كتير خلف الكلمات .. بأحب التلميحات قوي

نورتنا فعلا

الأحد, يناير 13, 2008

 
Blogger soma said...

بوست جامد ياباشمهندس..كشفت الأسرار العظمى
ومكافأتا ليك..انا هساندك

فيها ايه يا بنات لما الراجل يبصله بصه
فيها ايه يا حاجه لما الباشمهندس يمتع عنيه
خليه يبص..دا تليفزيون..يعنى أخره يبص
قوليله.. بص يا حبيبى ومتع نفسك ..وشوفيه ساعتها هيعمل ايه(وصفه مجربه)ووأبقو ادعولى
;)

الاثنين, يناير 14, 2008

 
Blogger kaed said...

واللة يا حمادة ياخويا أنا مش عارف حستحمل إزاى العيشة مع واحدة بس طول حياتى
اللة يكون فى عونك
الستات دول يتحبوا بس لكن أكتر من كدة بيقى الموضوع مغامرة غير محسوبة العواقب

الاثنين, يناير 14, 2008

 
Blogger أحمد سلامــه said...

:) ههههههههه
انتي مالك حازم كده مع الحاجة يا مراكبي
:)
بس حركة جامدة والله
انا بعد كده هكره قناة ميلودي عالديفيدي بتاع العربية كره

الاثنين, يناير 14, 2008

 
Blogger Gid-Do - جدو said...

يااحمد ياخويا ياحبيبى واضح انك مش معايا خالص ـ الست مراتى قالت لى فيها لخفيها وكمان رجلى على رجلك ـ كل افكارك النيرة غير قابلة للمناقشة معاها ـ الحل الوحيد اللى فاضل انى راح اتفق مع عيال من اللى هما اول مانزل مصر يخطفوها طول مدة الاجازة ويرجعوها وانا رايح على المطار وحفهمها انى دفعت شقى عمرى دية علشان يرجعوها ـ مع احمرار فى عينى ودموع وبحة فى الصوت لازوم سبك الدور ـ وبكدة اشوف نانسى واخوتها من خير رقابة ـ مطلوب منك اكبر خدمة ـ دلينى على العيال العدالة اللى بيخطفولك الحاجة فى كل زيارة ـ ومش راح اقول لحد ـ ومش راح انسالك الجميل ده

الاثنين, يناير 14, 2008

 
Blogger يا مراكبي said...

soma

أصيله والله .. إنتي اللي فيهم بجد .. وأديكي قولتي: آخرتها إيه يعني؟ بصة وحسرة وحقد وغل وخلاص .. مش أكتر من كده

نورتي



****************



kaed

نصيحة من أخوك: إمرأة واحدة لا تكفي .. دي بتفيض ةبتغرق كمان

خليك كده أحسنلك بجد



***********************



أحمد سلامــه

لأ ده أنا جامد جدا .. إنت ما تعرفنيش

هات الدي في دي أشيلهولك عندي .. عنك إنت



*******************



Gid-Do - جدو

أنا كده فهمت .. إنت طلبك عندي .. وعندي ليك حلول أحسن من طلبك ده كمان .. تحب سيارة مفخخة وألا عبارة وألا عمارة آيلة للسقوط؟ أنا أحب أخدم في الحاجات دي قوي .. بأفرح جدا في الحاجات دي

الثلاثاء, يناير 15, 2008

 
Blogger TAM said...

الناس الللى بتقرا لمكسوفة هل ممكن تصوتو ان كنتو موافقينها على الاعدام ولا لا ؟

الثلاثاء, يناير 15, 2008

 
Blogger Rania said...

بوست رائع يا مراكبى
ه
عارفة انا الحركات دى
يلا كلنا لها
و قلنا قبل كدة
الجواز نهاية كل ظالم؟
متاكد انك مظلمتش حد فى حياتك يا مراكبى ؟؟؟!!!!!!!!!
تحياتى

الثلاثاء, يناير 15, 2008

 
Blogger يا مراكبي said...

tam

أنا مش موافقها من أول يوم نشرت فيه بوست الإعدام وقلتلها رأيي كمان في تعليق مفصل



***********


Rania

ليه بس الإحراج ده؟ أيوة ظلمت في حياتي ناس قبل كده

لكن الحمد لله أنا زوج سعيييييييد جدا جدا .. مش ملاحظة السعادة اللي بتشر من كل حتة؟

:-)

الثلاثاء, يناير 15, 2008

 
Blogger zordeak said...

توضيح للباشمهندس احمد باشا

الكتاب الى حضرتك سمعت عنه ده هينزل لمدونة غادة مع نفسها وليس لمدونة احمد مع نفسه

:D

المعلومة وصلتلك غلط

بس يا سيدى احنا نتمنى فى المستقبل ان شاء الله بس لما يكون عندى كمية مواضيع تسمح بده

شكرا على الاهتمام وادعيلى اوعى تبطل

:D

الثلاثاء, يناير 15, 2008

 
Blogger يا مراكبي said...

zordeak

أهو يبقى فأل كويس برضه .. بكرة إن شاء الله تبقى مشهور جدا .. بس إبقى إفتكر أخوك

ربنا يوفقك دايما

الثلاثاء, يناير 15, 2008

 
Blogger Gid-Do - جدو said...

احمد باشا

تسلملى افكارك النيرة ـ انت المفرض تعينك الحكومة مستشار كبير قوى بمرتبات مدربين الكرة الخوجات ـ لان افكارك النيرة ممكن تبقى احسن حل لكل مشاكل مصر خاصة ان افكارك دية راح تخلص مصر من سكانها فى اول خطة خمسية

بدعيلك

الثلاثاء, يناير 15, 2008

 
Blogger يا مراكبي said...

Gid-Do - جدو

تسلملي يا جدو والله .. إنت تاني واحد يقوللي إني أنفع وزير وحاجة كده .. بس الأولاني كان متجوز إتنين وعايز يموت التالتة قبل ما يتجوزها .. إنتقام جامد جدا من الصنف كله

ربنا معاك بجد وينصرك عاللي في بالك

الثلاثاء, يناير 15, 2008

 

إرسال تعليق

Links to this post:

إنشاء رابط

<< Home