شد القلوع يا مراكبي ... مافيش رجوع يا مراكبي

السبت، يونيو 06، 2009

في الذكرى السنوية الثانية عشرة

في الذكرى السنوية الثانية عشرة لجوازي .. بأقعد أفكر في حاجات كتير قوي .. ياترى لو رجع بيا الزمن إتناشر سنة لورا وما كنتش إتجوزت .. مش كان زماني بأروح البيت بعد الشغل وأنتخ وأنام بدل ما أقعد أذاكر للأولاد ساعتين بسرعة علشان هيناموا بدري؟ مش كان زماني ما بأروحش السوق كل إسبوع مرتين علشان أشتري طلبات البيت اللي ما بتخلصش؟ أو أفضل كل صيف وكل شتا وكل عيد ألف المحلات كعب داير على شراء ملابس الأولاد وأحتار في المقاسات والألوان والأذواق .. والأسعار؟
.
مش كان زماني أقدر أنزل عالقهوة وأقعد مع أصحابي في أي وقت وفي أي يوم زي ما أنا عايز من غير ما أقعد أمهد إسبوع للخروجة دي؟ مش كان زماني أقدر أفتح قناة ميلودي براحتي وأبوس الواوا وأتفرج على الباشمهندسة نانسي عجرم و الباشمهندسة روبي والباشمهندسة كارول سماحة من غير ما أكون خايف من أي قصف جوي بالحلل والأطباق؟ مش كان زماني بأخش البيت وما ألاقيش الأولاد بيقولولي إتأخرت ليه وكنت فين .. والحاجة أمهم ساكتة ولا كأنها مسلطاهم عليا؟ مش كان زماني مش غصب عني بأروح الملاهي وأفضل أركب ده وأنزل دي لحد ما يتهد حيلي؟ أو نروح حمام السباحة وأفضل شايل المفعوصة الصغيرة على قلبي بالساعات وواخد بالي من الإتنين التانيين ليروحوا كده وألا كده؟
.
مش كان زماني حوشت كل الفلوس اللي إتصرفت دي كلها على أثاث البيت وحفل الزفاف ومصاريف الولادة والأطباء والمدارس والأكل والشرب والملابس والمناسبات الاجتماعية والعيش والعيشة واللي عايشينها؟ مش كان زماني دلوقت بقيت مليونير وكل البنات بتحبني وكل البنات بتغير؟
.
في الذكرى السنوية الثانية عشرة لجوازي .. لو رجع بيا الزمن إتناشر سنة لورا .. كنت إتجوزت بدري عن كده بثلاثة سنين كمان .. وكان زماني بأكتب بوست عنوانة .. في الذكرى السنوية الخامسة عشر لجوازي
.
موضوعات ذات صلة
في الذكرى السنوية العاشرة

التسميات:

37 Comments:

Blogger صدى الصمت - عاشقة الورد - said...

لولولولولولولولى
مش قادرة أصدق إنى أخيراً وبعد طول إنتظار لحقت أول تعليق
ماليش دعوة أنا عاوزة كانز بيبسى حالاً أو شيكولاتة من ال بالى بالك ال إنت بتجيبهالى
كل سنة وإنتم طيبين ياحبيبى ويارب يديم عليكم الحب والسعادة وهديان السر
سلام مؤقت

السبت, يونيو 06, 2009

 
Blogger بنت مصريه said...

كل عيد جواز وانتو طيبين
بلغ المدام تهنأتى يا مراكبى
بس صدقنى هتندم اخر ندم لو ما كنتش اتجوزت من 12 سنه
برضه كل فتره وليها حلاوتها
كل سنه وانتم طيبين

السبت, يونيو 06, 2009

 
Blogger لماضة said...

عقبال التأبيده يا حمايا
:))

السبت, يونيو 06, 2009

 
Blogger ـ-ـ- أحمد عبد العدل-ـ-ـ said...

يارب عقبال اليوبيل الذهبى وتكونوا بكل خير و حب و سعادة .... على فكرة مازال عندى أمل اننا هنقرا أشعار حضرتك اللى عند الحاجة و أعتقد الوقت مناسب جداً دلوقتى .. ولا ايه؟
يارب دايماً بتعلمنا الرقة و الجمال

السبت, يونيو 06, 2009

 
Blogger Jana said...

كل سنة وانتم بخير ومع بعض وفى وسط أولادكم الأمامير ربنا يحفظهم
وربنا يباركلكم فى السنين الجاية
وعقبال الذكرى ال 100
:)
قريت الذكرى ال11 والعاشرة
وحسيت بحاجة غريبة
ان الوقت بيجرى اوى
مع انى مكنتش لسه باجى هنا السنة الى فاتت"وده لسوء حظى طبعا" ومشاركتش فى التدوينات دى
لكن حسيت انهم قريبين اوى وكأنهم امبارح
ومتوقعة بكرة ان شاء الله تبقى الذكرى الثالثة عشر

نفسى اعرف بقى حكاية التلات سنين دول اللى مش عايز تنساهم فى ولا تدوينة منهم
:)

فين التورتة صحيح
ولا الشوبنج كله كان شمع ولا ايه!!؟

السبت, يونيو 06, 2009

 
Anonymous غير معرف said...

كل ده ندم على إنك اتجوزت..
على فكرة داخل التريقة و الهزار و في أعمق أعماق معاميعك الداخلية يتضح إنك حااااسس بندم رهيب على إنك اتجوزت..

إحنا جايين نهدي النفوس..

السبت, يونيو 06, 2009

 
Blogger حسن ارابيسك said...

مراكبي
كويس انك انت لحقت نفسك في أخر سطرين
وكل سنة وانتم طيبين
حسن أرابيسك

السبت, يونيو 06, 2009

 
Blogger Appy said...

لو نمتش اتجوزت مكنتش هتلاقى حد يطبطب عليك ولا يقولك مالك وانت مضايق كل اللى قولته اكيد متعه
كل سنه وانت والحاجه بخير يا رب

السبت, يونيو 06, 2009

 
Blogger شيمـــــاء said...

:)

السبت, يونيو 06, 2009

 
Blogger أحمـــــــــــــد أبو العلا said...

وعشان المناسبه الجميله ديه (مش جميله برضه ولا تقدر تقول حاجه تانيه) نهديلك اغنية
والليله عيييييد تن تن
الليله ديه عييييد تن تن

وتلاتلاف طوبه وعربية رمل

كل اللي بتقوله واقعي ومع ذلك كلنا في الآخر وبكل بساطه بنتجوز
ههههههههههههههه

السبت, يونيو 06, 2009

 
Anonymous الست فرويد said...

:)
كل سنه وانتم طيبين وعقبال 100 سنه يارب
وتجوز المفعوصه الصغيره واخواتها وتفرح بيهم :)

كنت هازعل منك قوى لو مكتبتش اخر سطرين

علشان امورتك واخوتها وامها احلى من كل البشمهندسات اللى حضرتك ذكرتهم
ومفيش لازمه للفلوس ولا مش هتتصرف عليهم

:)

ارق تحياتى لك

السبت, يونيو 06, 2009

 
Blogger !!! عارفة ... مش عارف ليه said...

كل سنة وأنت طيب

ومسئولياتك بتكبر مع السنة اللي بعدها

وأنت مستمتع بتأدية هذه المسئوليات

وليد

السبت, يونيو 06, 2009

 
Blogger محمد عبد الغفار said...

تعيش وتفتكر

السبت, يونيو 06, 2009

 
Blogger Ahmed Talk said...

شكرا علي النصيحة دي والواحد كده مقبل علي الزواج

السبت, يونيو 06, 2009

 
Blogger عدى النهار said...

كل ذكرى طيبة وإنت طيب يا مراكبي
:)

السبت, يونيو 06, 2009

 
Blogger كيــــــــــــارا said...

.
في الذكرى السنوية الثانية عشرة لجوازي .. لو رجع بيا الزمن إتناشر سنة لورا .. كنت إتجوزت بدري عن كده بثلاثة سنين كمان .. وكان زماني بأكتب بوست عنوانة .. في الذكرى السنوية الخامسة عشر لجوازي
.

***************

كل سنه وانتم سوا وقريبين من ربنا

السبت, يونيو 06, 2009

 
Blogger نبراس العتمة said...

أشك في نسبة العبارة الأخيرة لك
ممكن تكون كتبها تحت التهديد
ما لمحت به الى نانسي وروبي وهيفاء والحاجة أم العيال يعني
إما أن الحاجة مش واخدة بالها
وإما أنها أجبرتك على تعديل البوست

القاص المبدع الجميل
كل سنة وزواجك يثمر حبا
أعجبتني بعض قصصك التي قرأتها
وأعجبتني خفة دمك في البوست والقصص

حاولت الاتصال بك على بريدك الالكتروني
أتمنى أن تكون توصلت باميل مني
مودتي

السبت, يونيو 06, 2009

 
Blogger رؤية said...

انت واثق من اللي انت كاتبه دا
ولو واثق
مش خايف الحسد

شكل الخوف من الحسد
مبقاش تهديد مقابل لتهديدات اخري
هههههه


بهزر

كل سنه وانتو طيبين
ومع بعض متهنين
وفي الله متحابين

السبت, يونيو 06, 2009

 
Blogger مهندس حر said...

إتنااااااااشر سنة؟؟؟؟؟
صحيح العمر بيجرى يا ولاد!!!!!
.......

كل سنة و الحاجة طيبة و صابرة و العيال بخير.. أما إنت فربنا يهديك و يشفيك من الواوا اللى نفسك تبوسها..

السبت, يونيو 06, 2009

 
Blogger osama44 said...

انت صدت نفسنا عن الجواز ايه ي اخى ده
عايز اقولك حاجه
الراجل سواء كان مجوز او عازب فى كلا الحالتين مهزوم وعلشان كده خد اللى اقلهم ضرر
بوست رائع
وعقبال ماتكتب بوست
( فى الذكرى السنويه رقم ميه )
هههههههههه

السبت, يونيو 06, 2009

 
Blogger norahaty said...

(من غير ما أكون خايف من
أي قصف جوي بالحلل والأطباق)
يــــــــــــــاراجل حرام عليك
دى حتى الحاجة باين عليها اميرة خالص:)

السبت, يونيو 06, 2009

 
Blogger well said...

يا مراكبى ..
مشكلة الزمن انه ما بيرجعش

السبت, يونيو 06, 2009

 
Blogger norahaty said...

بس بجد عكست(الاحتمالية التصورية)
لنهاية الموضوع عندى بكون تمنيت
الزواج قبل هذا بثلاث سنوات:)

السبت, يونيو 06, 2009

 
Blogger norahaty said...

لأ بس بجد انت زى ما بيقول
(الغير معرف )فى قاع معاميعك
ولا معرفش ايه دى انت نادم على الزواج؟ بجد لو كده ازعل:(

السبت, يونيو 06, 2009

 
Blogger دردشة على الماشى said...

كل سنة وانتو طيبين وعقبال100سنة زواج
سلملى على المدام
وحشتونا جدا مستنيينكو
سلام

الأحد, يونيو 07, 2009

 
Blogger Rehab Mostafa said...

كل عيد جواز وانت طيب
أحلى حاجه الكلمتين اللي في الأخر :)
عقبال اليوبيل الذهبي :)

الأحد, يونيو 07, 2009

 
Blogger سبهللة said...

كل سنة وانتو طيبين
وعقبال ما بنار لكم فى الذكرى السنوية الثانية والخمسين
انا كما لو رجع بيا الزمان كنت اتجوزت وانا عندى 16 سنة بدل 26 سنة
بجد مش هزار
وكان زمانى دلوقتى عندة 6عيال بدل اتنين
ادعيلى ربنا يرزقنى بالتالت
ولو سمحت بلغ المدام تهنئتى لها
ثم لو كنت حوشت كل اللى اتصرف دة كنت هاتعمل بيه ايه؟؟
كنت هاتجوز برضه
تحياتى لكما
وبالتوفيق ان شاءالله

الأحد, يونيو 07, 2009

 
Anonymous mimi said...

كل سنة وانتم طيبين وعقبال السنة المليون يارب ومع بعض دائما في سعادة وسلامناللجميع

الأحد, يونيو 07, 2009

 
Blogger Rania said...

عيد جواز عليكو سعيد ان شاء الله و ديما فى سعاده و هنا و حب و سلام اخدلى بالك من سلام ده :)
ربنا يحفظكوا ديما و يحفظلك اولادك يا رب

بس انت مش ملاحظ انك بدات تتعدى من اصحابك الخونه اللى قلتلنا عليهم و لا المووضع كنت كاتبه و انت فى لحظه تهديد ؟

الأحد, يونيو 07, 2009

 
Blogger hana said...

نفسي أعمل دراسة عن الواوا والحلل الطايرة وســرإلتصاقها بالرجل!!

بس إعترف إيه حكاية الراجل مع الواوا؟

هههههههههههههه

كل سنة وإنت وهي طيبيين وحلوين وقريبيين

الأحد, يونيو 07, 2009

 
Blogger خمسة فضفضة said...

السلام عليكم ورحمة الله وبركاته

قاعده اقول انا قريت الكلام ده فين قبل كده

فين يا فضفضة فيييييييييين

الاقيني قريته هنا في الذكري ال11 لزواجك يا عم مراكبي

كل سنة وانت طيب والحاجه طيبه وعقبال التأبيده هههههههههههههه

الأحد, يونيو 07, 2009

 
Blogger بتنفس حريه said...

تعيش وتفتكر :)

الأحد, يونيو 07, 2009

 
Blogger يا مراكبي said...

أشكركم جميعا من كل قلبي فردا فردا

أشكركم على شعوركم الرقيق

شكر الله سعيكم

ههههههه

الاثنين, يونيو 08, 2009

 
Blogger Blank-Socrate said...

جميله قوى قوى
كل سنه و انت طيب و سعيد
اما انا بقى فخلااااااص مصر كلها عارفه انى بادور على عروسه
اتعقدت
:) تحياتى

الثلاثاء, يونيو 09, 2009

 
Blogger وينكى said...

كل سنه وانت طيب يا مراكبي
وعقبال الاحتفال بالمئوية
:))
أقولك على حاجه.. لو ماكنتش اتجوزت من اتناشر سنة كنت هاتلاقى ألف حاجه وحاجه برضه تصرف فيها فلوسك
وماكنتش هاتحوش برضه:)
ربنا يخليلك أحبابك كلهم

الأربعاء, يونيو 10, 2009

 
Blogger Rozza!.......فاقد الذاكرة said...

يا سيدي كلها 10 سنين كمان وتزوج العيال وترجع حبيب مرة تانية, تاخد المدام عالسنما وتتعشو برى عالنيل وتشتاق للعيال وهمى صغيرين
ولله الحمد على الزوجة الصالحة صاحبة الغيرة
الخفيفة

الثلاثاء, يونيو 16, 2009

 
Blogger لاسع افندى said...

عقبال 100سنه جواز وانت طيب وصامد وصابر



تحياتى

الثلاثاء, يونيو 16, 2009

 

إرسال تعليق

Links to this post:

إنشاء رابط

<< Home